Nagsagawa ng isang greyhound operation nitong Martes ang Bureau of Jail Management and Penology (BJMP)-Romblon District Jail at Philippine Coast Guard (PCG) Station Romblon upang matiyak na nananatiling ligtas at walang kontrabando ang pasilidad.
Nakatuon ang K9-assisted inspection sa pagtukoy ng ilegal na droga at iba pang ipinagbabawal na gamit sa loob ng kulungan. Isang K9 na sinanay ng PCG ang ginamit sa operasyon.
Ayon sa mga awtoridad, negatibo ang naging resulta ng operasyon.
Pahayag ni Jail Officer 3 Joefrie Anglo, regional information officer ng BJMP-Mimaropa, layunin ng aktibidad na ipakita ang patuloy na pangako ng ahensya sa pagpapanatili ng kaayusan at seguridad sa kanilang mga pasilidad.
Regular na nagsasagawa ng Greyhound Operations ang BJMP, katuwang ang iba pang ahensya ng pamahalaan, bilang bahagi ng kampanya nito na palakasin ang seguridad sa mga kulungan at mapangalagaan ang kapakanan ng mga PDL at kanilang mga tauhan.
