Bilang tugon sa direktiba ni Pangulong Ferdinand “Bongbong” Marcos Jr. na pabilisin ang pamamahagi ng mga lupaing agrikultural sa mga benepisyaryo ng reporma sa lupa, naipamahagi na ng Department of Agrarian Reform (DAR) ang kabuuang 386 e-Titles sa lalawigan ng Romblon mula 2022 sa ilalim ng Project SPLIT (Support to Parcelization of Lands for Individual Titling).
Layon ng programa ni Pangulong Marcos na maipasa sa mga agrarian reform beneficiaries (ARBs) ang kanilang sariling lupang sinasaka sa pamamagitan ng pag-isyu ng mga e-Titles at Certificate of Condonation and Release of Mortgage (CoCROM), bilang patunay na wala na silang utang sa gobyerno kaugnay sa lupa.
Batay sa datos ng DAR Romblon, naipamahagi ang mga e-Titles sa mga bayan ng Odiongan, San Fernando, Magdiwang, Cajidiocan, Looc, Calatrava, San Agustin, Alcantara, Santa Maria, San Andres, Ferrol, Romblon, at Santa Fe.
Ang breakdown ay 52 e-Titles noong 2022, 169 noong 2023, 137 nitong 2024, at 28 ngayong 2025. Tinatayang tatlong ektarya ang saklaw kada benepisyaryo.
Noong Disyembre 3–4, 2024, namahagi rin ang DAR ng 310 CoCROM sa mga ARB sa lalawigan upang opisyal na tanggalin ang kanilang obligasyong bayaran ang lupa sa ilalim ng agrarian reform.
Muli ring binigyang-diin ni Pangulong Marcos sa kanyang State of the Nation Address (SONA) 2025 ang kahalagahan ng mabilis na pamamahagi ng mga titulo ng lupa upang mapatatag ang kabuhayan ng mga magsasaka.
“Kasalukuyang pinapabilis ng DAR ang pamamahagi ng mga CLOA at ng mga E-Titles. Pati na ‘yung mga CoCROM, bilang patunay na wala nang utang ang mga benepisyaryo ng agrarian reform,” ani Marcos.
Ang Project SPLIT ay isa sa mga flagship program ng administrasyon upang isulong ang inclusive growth at rural development sa pamamagitan ng pagbibigay ng sariling lupa sa mga tunay na nagsasaka nito.
