Buong suporta ang ipinahayag ni Romblon Representative Eleandro Jesus Madrona sa muling pagtakbo ni Leyte Representative Martin Romualdez bilang Speaker ng House of Representatives para sa nalalapit na ika-20 Kongreso.
Sa isang pahayag na inilabas nitong Linggo, Hulyo 27, pinuri ni Madrona ang istilo ng pamumuno ni Romualdez na aniya’y may matatag na integridad, epektibong pamumuno, at tunay na malasakit sa sambayanang Pilipino.
“Ang lider na mapagkakatiwalaan, hindi lamang sa salita kundi sa gawa at malasakit,” ani Madrona.
Tinukoy din ng kongresista ang abilidad ni Romualdez na pag-isahin ang mga miyembro ng Kongreso mula sa iba’t ibang partido, maisulong ang mga makabuluhang panukalang batas, at mapanatili ang maayos na ugnayan sa administrasyong Marcos habang pinangangalagaan ang kalayaan ng Kamara.
“Sa kanyang pamumuno, naipasa ang mga makasaysayang batas at nanatiling produktibo ang ugnayan ng Lehislatura at Ehekutibo — nang hindi nasasakripisyo ang mandato ng Saligang Batas. Iyan ang klase ng lider na bihira at kailangan sa ngayon,” dagdag pa ni Madrona.
Binigyang-diin din niya ang pangangailangan para sa “continuity, competence, and clarity of vision” sa panahong ito, na aniya’y taglay lahat ni Romualdez.
Hinimok ni Madrona ang kanyang mga kapwa mambabatas na suportahan ang panibagong termino ni Romualdez bilang House Speaker sa pagbubukas ng 20th Congress.
