Nagsagawa ng apat na araw na field monitoring visit ang Regional Project Monitoring Team (RPMT) ng Regional Development Council (RDC) MIMAROPA sa mga isla ng Tablas at Romblon mula Hunyo 17 hanggang 20, 2025 upang suriin ang kalagayan ng mga imprastraktura at suportahan ang mga local project monitoring committees.
Kasama sa team ang mga kinatawan mula sa Department of Budget and Management (DBM), Department of the Interior and Local Government (DILG), Office of the President–Presidential Management Staff (PMS-FSSCO), Department of Economy, Planning, and Development (DEPDev), at Romblon Provincial Project Monitoring Team. Ininspeksyon nila ang mga mungkahi, isinasagawa, at natapos nang proyekto sa lalawigan.
Kabilang sa mga binisita ay ang P285.64 milyong Sijeron Bridge sa Tablas Circumferential Road. Sa kasalukuyan ay nasa Phase II na ang proyekto na may habang 167.796 metro na layong pag-ibayuhin ang konektibidad sa pagitan ng mga bayan sa isla ng Tablas.
Ininspeksyon din ng team ang natapos na Dubduban Flood Control Structure (Upstream) sa San Agustin na may halagang P241.24 milyon, na layong mabawasan ang pagbaha sa mga karatig na komunidad.
Sa bayan ng Romblon, binisita rin ang P166.23 milyong Coastal Road/Boulevard and Causeway project malapit sa Sablayan Port. Layon nitong mapabuti ang access sa mga destinasyong panturismo at magsilbing proteksyon laban sa tidal surges at iba pang panganib dulot ng panahon.
Kasama rin sa monitoring ang mungkahing Maritime Safety Enhancement Project (MSEP) na may inisyal na budget na P3.808 bilyon sa ilalim ng Department of Transportation at Philippine Coast Guard. Kabilang sa proyekto ang pagtatayo ng Buoy Base at pagbili ng dalawang Buoy Tender Vessels sa Cajimos, Romblon.
Binisita rin ng grupo ang Romblon State University sa Odiongan para sa pagsusuri ng natapos na Phase I ng College of Business, Accountancy, and Technopreneurship Building na nagkakahalaga ng P24.60 milyon.
Sa ikalawang araw ng monitoring, nagsagawa ang Project Monitoring and Evaluation Division (PMED) ng DEPDev MIMAROPA ng training para sa 37 kalahok mula sa mga local at municipal project monitoring committees kaugnay sa updated na Regional Project Monitoring and Evaluation System (RPMES) Operational Guidelines at paggamit ng eRPMES platform.
