Nagpahayag ng pasasalamat ang ilang mahihirap na ina sa lalawigan ng Romblon kay Pangulong Ferdinand R. Marcos Jr. matapos maisakatuparan ang kanyang pangakong palawakin at dagdagan ang tulong-pinansyal sa ilalim ng Pantawid Pamilyang Pilipino Program (4Ps).
Sa kanyang 2024 State of the Nation Address (SONA), inihayag ni Pangulong Marcos ang pagtaas ng cash grants at ang pagpapalawak ng saklaw ng 4Ps upang mas maraming inang may anak na edad 0–2 taon ang makinabang sa karagdagang ayuda.
Ngayong taon, nagsimula nang ipamahagi ng Department of Social Welfare and Development (DSWD) ang dagdag na ayuda sa mga kwalipikadong 4Ps beneficiaries sa Romblon, kabilang ang mga nanay na nahihirapan sa pagbili ng gatas at diaper para sa kanilang sanggol.
Binibigyang-diin ng programa ang kahalagahan ng unang 1,000 araw ng isang bata—mula sa sinapupunan hanggang sa ikalawang taon—na kinikilala bilang kritikal na yugto para sa pisikal at mental na pag-unlad ng isang bata. Sa ilalim ng pinalawak na programa, tumatanggap ng karagdagang ₱350 kada buwan ang mga buntis at inang may anak na edad 0–2 taon para sa nutrisyon, bakuna, at check-up.
Ayon sa datos ng DSWD MIMAROPA, nasa 5,702 miyembro ng 4Ps sa rehiyon ang kwalipikado para sa First 1,000 Days (F1KD) cash grant.
Isa sa mga benepisyaryo, si Poebe Nil Moreno Mingo ng Barangay Logbon, Romblon, Romblon at inang may anim na anak, ay nagsabing malaking tulong ang dagdag na ₱350 sa pangangailangan ng kanyang isang taong gulang na anak.
“Malaking tulong talaga ito para sa diapers at gatas ng aking baby,” ani Mingo. Bukod sa ₱3,300 kada buwan para sa kanyang dalawang batang nasa elementarya, nakakatanggap din siya ng dagdag na ayuda dahil sa F1KD.
Samantala, si Ada Mallorca Salvador ng Barangay Bangon sa Odiongan ay ginagamit ang dagdag-ayuda para sa vitamins ng kanyang dalawang buwang gulang na sanggol.
“Malaking bagay na po dahil may naidagdag ako pambili ng vitamins at gatas ng aking baby para hindi mabawasan ‘yung para sa pag-aaral ng kuya niya,” pahayag niya.
Si Janilie Flores ng Barangay Amatong sa Odiongan ay nagsabing nakatulong ang dagdag-ayuda sa kanilang pang-araw-araw na gastusin, lalo na’t may apat siyang anak, kabilang ang isang sanggol.
“Salamat po kay Pangulong Marcos dahil sa dagdag na programa niya ay nakaluwag-luwag po kami kahit papaano,” ani Flores.
Ayon kay Aela Malubag-Miguel, Information Officer ng DSWD Field Office MIMAROPA, ang mga 4Ps beneficiary na mabubuntis ay sasailalim sa validation upang agad na maiproseso ang karagdagang ayuda. Hinikayat din niya ang mga benepisyaryo na makipag-ugnayan sa kanilang lokal na social welfare office para sa tamang pagproseso.
Ang programang ito ay bahagi ng layunin ng pamahalaan na masiguro ang kalusugan at kinabukasan ng bawat batang Pilipino, mula sa sinapupunan hanggang sa kanilang paglaki.
