Umabot sa kabuuang 1,829 micro, small, and medium enterprises (MSMEs) sa lalawigan ng Romblon ang nakatanggap ng tulong mula sa Department of Trade and Industry (DTI) mula Enero hanggang Hulyo 2025, alinsunod sa direktiba ni Pangulong Ferdinand R. Marcos Jr. na palawakin ang suporta para sa maliliit na negosyo sa bansa.
“Patuloy tayong nagbibigay ng libreng training at puhunan para makapagtayo sila ng sariling negosyo… Hindi tayo titigil hanggang halos dalawa’t kalahating milyong maralitang pamilya ay matutulungan natin na magkaroon ng kanilang sariling maliit na negosyo,” ayon sa pahayag ni Pangulong Marcos sa kanyang ika-apat na State of the Nation Address noong Hulyo 24.
Ayon kay DTI Romblon Provincial Director Orville Mallorca, nakatutok ang kanilang tulong sa mga pangunahing aspeto gaya ng entrepreneurial mindset, business mastery, mentoring, access to financing, equipment support, market linkage, at pagbuo ng sustainable business models.
Sa kabuuan, 538 MSME operators ang nabigyan ng business counseling, habang 288 ang lumahok sa skills development at enterprise-related training. Marami rin ang nakinabang sa financial literacy programs at iba pang serbisyong hatid ng mga Negosyo Centers sa lalawigan.
Sa kasalukuyan, may 11 Negosyo Centers na ang aktibong nagbibigay serbisyo sa 16 na bayan ng Romblon, na nagsisilbing pangunahing access point ng mga MSME sa negosyo at pagsasanay.
Sinabi ni Mallorca na ang pagpapatupad ng mga programang ito sa Romblon ay nakaangkla sa pambansang layunin na itaguyod ang entrepreneurship at palakasin ang partisipasyon ng MSMEs sa mga gawaing pang-ekonomiya.
Saklaw ng mga MSME sa Romblon ang iba’t ibang industriya gaya ng food processing, handicrafts, retail, at serbisyo. May ilan ding lumalawak na ang operasyon sa mga sektor na binigyang-diin sa SONA, gaya ng konstruksyon at sustainable industries.
Dagdag pa rito, may mga MSME na sa Romblon ang nagsimula na ring pumasok sa agri-business development bilang tugon sa panawagan ni Pangulong Marcos na palakasin ang pamumuhunan ng pribadong sektor sa agrikultura.
Inaasahan na magpapatuloy ang pagbibigay ng tulong sa mga MSMEs sa Romblon sa pakikipagtulungan ng mga local government units, bilang bahagi ng layunin ng pamahalaan na mabigyan ng kabuhayan ang mga pamilyang mababa ang kita.
