Napilitang bumalik sa Batangas Port nitong Linggo ng gabi, July 27, ang M/V Reina Del Rosario ng Montenegro Shipping Lines matapos makaranas ng aberya sa isa sa mga makina nito habang nasa biyahe patungong Odiongan, Romblon.
Ayon sa Philippine Coast Guard (PCG), bandang 7 nautical miles northwest ng Balingawan Point, Pola, Oriental Mindoro nang iulat ng kapitan ng barko ang pagkasira ng crankcase ng port engine.
Dahil dito, nagdesisyon ang kapitan na bumalik sa Batangas gamit lamang ang starboard engine upang masigurong ligtas ang lahat ng sakay.
Nasa kabuuang 383 pasahero, 3 crew, at 20 rolling cargoes ang sakay ng barko sa oras ng insidente.
Pagdating sa Batangas Port, agad na rumesponde ang mga tauhan ng PCG at medical responders upang tiyakin ang kaligtasan ng mga pasahero. Lahat ay ligtas at walang naiulat na nasaktan.
Dakong alas-8:30 ng umaga ng July 28, 375 sa mga pasahero at 19 rolling cargoes ang inilipat sa M/V Maria Xenia na siyang nagpatuloy ng biyahe patungong Odiongan.
Inaasahang isasaayos muna ang nasirang makina ng M/V Reina Del Rosario bago ito muling payagang maglayag.
