Magsisimula nang magbenta ng bigas sa halagang ₱20 kada kilo ang Department of Agriculture (DA) sa rehiyon ng MIMAROPA sa darating na Biyernes, Mayo 16, sa lungsod ng Calapan, bilang bahagi ng programang Kadiwa ng Pangulo ng pamahalaan.
Layon ng inisyatibong ito na matulungan ang mga sektor na pinakaapektado ng mataas na presyo ng bilihin sa gitna ng patuloy na hamon sa usapin ng inflation at seguridad sa pagkain.
Ibebenta ang subsidized rice sa Kadiwa Center sa Barangay Sta. Isabel, na pinangangasiwaan ng Calsedeco Multi-Purpose Cooperative.
Ayon kay Christian Caranza, Marketing Specialist mula sa Agribusiness and Marketing Assistance Division ng DA MIMAROPA, nasa 50 sako o katumbas ng humigit-kumulang 2.5 metriko toneladang bigas mula sa National Food Authority (NFA) sa Calapan City ang inisyal na stock, at inaasahan pang madadagdagan ito batay sa magiging demand.
Ang mga kwalipikadong benepisyaryo ng programa ay kinabibilangan ng mga senior citizen, persons with disabilities (PWDs), solo parents, at mga miyembro ng Pantawid Pamilyang Pilipino Program (4Ps).
Upang matiyak ang pantay-pantay na distribusyon ng bigas, nagpatupad ang DA ng limitasyon sa pagbili — hanggang 10 kilo lamang ang maaaring bilhin kada transaksyon, at tatlong beses kada buwan. Kailangan ding magpakita ng valid ID ang mga bibili upang mapatunayang sila ay kabilang sa mga kwalipikadong sektor.
“Bahagi ito ng mas malawak naming layunin na gawing mas abot-kaya ang mga pangunahing produkto lalo na sa mga sektor na higit na nangangailangan,” pahayag ni Caranza.
Ang Kadiwa ng Pangulo ay isang inisyatibong naglalayong ikonekta ang mga lokal na magsasaka direkta sa mga konsyumer, upang maiwasan ang mga middleman at mapababa ang presyo ng mga pangunahing bilihin.
Una nang sinubukan ang ₱20/kilo rice program sa Visayas nitong unang bahagi ng Mayo, at inatasan na ni Pangulong Ferdinand R. Marcos Jr. ang DA na palawakin ang pagpapatupad nito sa buong bansa at panatilihin ito hanggang sa taong 2028.
