Nakikiisa si Senador Lito Lapid sa buong Simbahang Katolika at sambayanang Kristiyano sa pagdadalamhati sa pagpanaw ni Pope Francis, ang ika-266 na Santo Papa ng Simbahang Katolika.
Sa kanyang pahayag, inilahad ni Senador Lapid ang kanyang lungkot sa pagpanaw ng Santo Papa sa gitna ng pagdiriwang ng Pasko ng Pagkabuhay ni Hesukristo, habang siya’y nagpapagaling pa mula sa karamdaman.
“Bilang isang Kristiyano, nakikiisa po ako at buong pamilya ko sa pagdadalamhati ng buong mundo sa kanyang pagkawala,” ani Lapid.
Kinilala rin ng senador ang mahalagang papel ni Pope Francis sa pagpapalaganap ng pag-ibig ng Diyos sa buong mundo. “Si Pope Francis ang nagbahagi sa buong mundo ng tunay na pag-ibig ng Diyos sa sangka-Kristyanuhan at nagreporma sa ilang patakaran ng Simbahang Katolika,” dagdag niya.
Ang pagpanaw ni Pope Francis ay itinuturing na isang napakalaking kawalan, ngunit ang kanyang mga aral at halimbawa ng kababaang-loob at malasakit ay mananatili sa puso ng milyun-milyong mananampalataya sa buong mundo.
