Mariing pinabulaanan ni Odiongan Mayor Trina Fabic ang kumakalat na isyu na ililipat umano sa kanyang bayan ang Kapitolyo ng lalawigan ng Romblon sakaling siya ay mahalal bilang gobernador.
Ayon sa mga kumakalat sa social media, sinasabing plano umano ni Mayor Fabic na ilipat ang Kapitolyo mula sa kasalukuyang lokasyon nito sa bayan ng Romblon patungo sa Odiongan — isang hakbang na umano’y isasakatuparan kapag siya na ang naupo bilang gobernador.
Ngunit iginiit ni Mayor Fabic na ito ay pawang peke.
“Walang katotohanan ang mga balitang iyan,” giit ng alkalde.
Aniya, ang mga ganitong uri ng disimpormasyon ay hindi lamang nakakapanira sa kanyang pangalan kundi nakapagdudulot din ng pagkakabaha-bahagi sa mga mamamayan ng lalawigan.
Nanawagan si Mayor Fabic sa publiko na huwag basta-basta maniwala sa mga kumakalat na impormasyon sa social media, lalo na kung ito ay walang malinaw na pinagmulan o beripikasyon mula sa mga awtoridad.
Hinikayat din niya ang mga mamamayan na magtanong sa mga opisyal na tanggapan kung may alinlangan sila sa mga isyung may kinalaman sa pamahalaan.
