Mariing pinabulaanan ni Odiongan Mayor Trina Fabic ang kumakalat na impormasyon na mawawala umano ang ilang pangunahing programa ng pamahalaang panlalawigan sakaling siya ang manalong gobernador ng Romblon sa darating na halalan.
Sa isang post sa kanyang social media, sinabi ni Fabic na pawang “fake news” ang mga sinasabing mawawala ang OneRomblon Health Card, scholarship program, social pension para sa mga Persons with Disabilities (PWDs), at maging ang mga pumpboat na ginagamit para ihatid ang mga pasyente.
“Sana hindi basta-basta’t gumagawa ng fake news itong ibang mga staff ng Office of the Governor. Itaas ang antas ng pulitika sa probinsya,” giit ni Fabic.
Aniya, karamihan sa mga nabanggit na programa ay nagsimula pa sa panahon ni dating Governor Lolong Firmalo, at hindi ito basta-basta mawawala dahil may mga lokal na ordinansa ang ilan sa mga ito. Kabilang sa mga nabanggit ay ang dating PGSP o Provincial Government Scholarship Program, na siyang pinagmulan ng kasalukuyang scholarship program ng lalawigan.
Ipinaliwanag din ni Fabic na siya mismo ang nag-field visit sa Negros upang pag-aralan ang NOCHP program na naging modelo ng SulongHealth Card—na sa kalaunan ay pinalitan ng pangalan bilang OneRomblon Health Card.
Tiniyak din ni Fabic na ipagpapatuloy ang social pension para sa mga PWDs at ang pagkakaroon ng para-teachers na unang ipinatupad sa ilalim ng administrasyong Firmalo. Gayundin, ang paghahatid sa mga pasyente ay isasama sa planong provincial health referral/network system na layong gawing mas mabilis at automatic ang serbisyo.
“Lahat ng mga programa, basta’t nakakabuti sa mga tao ay dapat ipagpatuloy. Mas dadagdagan pa natin ito para mas may impact sa buhay ng mga tao,” dagdag ni Fabic.
Hinimok din niya ang publiko na huwag basta-basta maniwala sa mga paninira at i-verify muna ang mga impormasyon bago ito paniwalaan.
