Patuloy ang pagsasakatuparan ng kampanya para sa digital financial inclusion sa pamamagitan ng inisyatibong “e-Panalo ang Kinabukasan” ng Pantawid Pamilyang Pilipino Program (4Ps) na isinasagawa sa Barangay Bagacay sa Romblon, Romblon nitong Miyerkules, April 23.
Layunin ng aktibidad na palawakin ang kaalaman ng mga 4Ps beneficiaries sa mga modernong opsyon ng pagtanggap ng kanilang cash grants. Sa halip na sa tradisyonal na bangko lamang, maaari nang gamitin ng mga benepisyaryo ang mga e-wallets at digital platforms upang mas mabilis, ligtas, at maginhawa ang pagtanggap ng ayuda.
Labing-anim (16) na benepisyaryo mula sa bayan ng Romblon ang dumalo sa oryentasyong isinagawa ng mga partner financial service providers.
Bukod sa pagbibigay ng impormasyon ukol sa digital financial transactions, layunin din ng “e-Panalo ang Kinabukasan” na palakasin ang kaalaman ng mga benepisyaryo sa pagba-budget, pag-iipon, at pag-iwas sa mga scam.
Katuwang ng programa ang mga kilalang financial service providers tulad ng GCash, Globe Telecom, BPI Foundation Inc., Ayala Foundation Inc., Maya, at Landbank of the Philippines.
Hindi lamang sa bayan ng Romblon ipatutupad ang inisyatibo. Nakatakda ring isagawa ang aktibidad sa mga munisipalidad ng Cajidiocan at San Fernando sa lalawigan ng Romblon, bilang bahagi ng mas malawakang layunin ng 4Ps na gawing mas matatag at mas maalam sa pinansyal na aspeto ang bawat pamilyang Pilipino.
