Dahil sa kalasingan, isang rider sa bayan ng Romblon, Romblon ang namatay matapos masalpok nito ang isang truck na nakaparada sa tabi ng kalsada sa bahagi ng Barangay Tambac, Romblon, Romblon nitong gabi ng Linggo.
Kinilala ang rider na si Jude Morante, 24-anyos, habang an angkas nito na sugatan ay kinilalang si Rex Salvana.
Batay sa imbestigasyon ng Romblon Municipal Police Station, galing sa inuman ang dalawa at binabaybay na ang national road nang biglang mawalan ng kontrol sa sasakyan si Morante hanggang sa nasalpok nito ang nakaparadang 10-wheeler truck sa tabi ng kalsada.
Nagtamo ng malubhang sugat sa ulo si Morante na naging dahilan ng kanyang agarang pagkamatay habang si Salvana naman ay nagtamo ng sugat sa iba’t ibang bahagi ng katawan.
Agad isinugod sa Romblon District Hospital si Salvana para magamot.
Walang suot na helmet ang mga sakay ng motorsiklo ng mangyari ang aksidente ayon sa mga kapulisan.
