Nitong nakalipas na mga linggo, maraming tsokaran natin ang na-stress sa masasamang balita tulad nang wala na yatang solusyong trapik. Kaya maganda naman sigurong pag-usapan natin ang good news tulad ng pagtapyas sa bayarin natin sa kuryente.
Pero bago ‘yan, gugunitain nakaraang Agosto 21, ang ika-36 na taon ng pagkamatay ng bayaning si dating Senador Benigno Ninoy Aquino Jr. Maaaring may mga nagsasabi na hindi dapat na ituring bayani si Ninoy, pero ang hindi maitatanggi, matindi ang pagmamahal na ipinakita niya sa bayan at sa mga Filipino.
Para sa mga kabataan at mga bata na walang muwang sa nangyari noong Agosto 21, 1983, binaril si Ninoy sa dating Manila International Airport (NAIA na ngayon) habang bumababa siya sa eroplano. Galing si Ninoy sa Amerika kung saan siya na-exile o nanirahan ng ilang taon kasama ang kaniyang pamilya.
Kung tutuusin, puwedeng doon na siya magretiro sa Amerika dahil may trabaho na siya at ligtas ang kaniyang pamilya laban sa mga banta sa kaniyang buhay. Ngunit sa kabila ng mga natanggap niyang banta, pinili pa rin niyang umuwi para tumulong sa anumang paraan upang hindi tuluyang mauwi sa kaguluhan ang bansa.
Sa mga nais malaman ang kuwento ng buhay ni Ninoy at kung bakit itinuring siyang bayani, isang pindot lang ang kailangan sa tulong ng internet; in short, i-“GMG.” Sabi nga natin, may mga hindi naniniwalang bayani si Ninoy kaya suriing mabuti ang mga impormasyon na mga mababasa at mapapanood na mga video. Sagutin ang tanong, bakit siya kailangang patayin at binaril nang walang kalaban-laban?
At para sa good news , asahan na mananatili ang trapik at titindi pa habang papasok ang “ber” months pero magkakaroon naman ng bawas singil sa kuryente. Mangyayari iyan dahil sa inaprubahang batas na tinawag na “Murang Kuryente Act.”
Sa ilalim ng naturang batas, papayagang gamitin ang P207-bilyon na Malampaya Fund para bayaran ang mga utang ng National Power Corporation, na kasama sa mga binabayaran ng mga power consumer na makikita sa billing na “universal charges.”
Kung totoo ang pagtaya ng isang mambabatas tungkol sa matitipid o makakaltas sa bayarin natin sa kuryente, ang mga komukonsumo ng 200 kilowatt-hours sa isang buwan ay makakatipid daw ng P169.48. Aba'y hindi na masama. Puwede nang pambili ng nasa apat hanggang limang kilo ng magandang kalidad na bigas.
Kapag naayos na ang mga dapat ayusin sa pagpapatupad ng batas, posibleng makita raw ang kaltas sa billing ng Oktubre o Nobyembre. Iyong nga lang mga tsong, hindi natin alam kung hanggang kailan ito tatagal. Kasi naman, inaasahan daw na mauubos na ang natural gas na nakukuha sa Malampaya sa Palawan pagsapit ng 2024.
Kaya naman may mga plano na maghanap ng lugar na pagmiminahan ng kapalit ng Malampaya. At ang isang nakikita rito ang Recto Bank, na pilit na inaangkin ng China. Mantakin niyo mga tsong, kung tinatayang 2.7 trillion cubic feet ang natural gas deposit sa Malampaya, ang nasa Recto bank, triple raw sa dami. Kaya naman tulo-laway ang mga Tsino sa naturang lugar.
Bukod sa “Murang Kuryente” act, may bahagyang kaltas pang aasahan sa singil sa kuryente dahil naman sa mahigit P1 bilyon refund na iniutos ng Energy Regulatory Board sa Meralco. Aba'y namomonitor ba ERC at maging SC ang mga iniuutos nilang refund sa Meralco?
May good news din sa mga masisipag na service crew sa mga restaurant at iba pang establisimyento na nagpapataw ng “service charge” sa kanilang mga costumer. Sa ilalim ng isa pang bagong batas, 100 porsiyento ng makokolektang service charge ay paghahati-hatian na nila, at wala nang cut dito ang mga bossing at pamunuan. Kaya abang-abang lang tayo mga tsong baka sa mga susunod na araw, may good news na tungkol sa trapik.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
