Nangyari na naman ang kinatatakutan natin mga tsong tungkol sa mga “siga” sa kalye na apat ang paa na dapat katakutan. Kamakailan lang, isang college student na lalaki ang namatay dahil sa pagtakbo palayo sa sigang ito—ang aso.
Wala namang duda na “man’s best friend” ang mga aso kung ikaw ang kanilang amo at nagpapakain sa kanila. Pero kung isa kang estranghero na napagawi sa kanilang “teritoryo,” aba’y mortal enemy ang tingin nila sa s’yo at puwede kang sakmalin na parang buto ng bulalo.
Kapag nakagat ka, masuwerte kung sakit na dulot ng sakmal lang ang aabutin mo. Kung minalas-malas ka naman, baka madale ka ng rabies na kung hindi maagapan, ikatotodas mo. Kung mabilis ka namang tumakbo, dapat magkaingat ka naman sa tatakbuhan mo dahil baka madisgrasya ka pa rin.
Ganito nga ang nangyari sa mag-aaral na si Joshua Cabag, na sa pagtakbo palayo sa aso na humabol sa kanila ng mga kaibigan niya sa Quezon City, aba’y nabundol siya ng humaharurot na sasakyan. Ang masaklap nito, pumanaw siya sa mismong araw ng kaniyang kaarawan, at hindi pa siya tinigilan ng motoristang nakadisgrasya sa kaniya.
Ano ang nangyari sa asong humabol sa biktima? hindi na sinabi sa mga lumabas na ulat. Pero kung tutuusin, dapat magkaroon ng pananagutan dito ang may-ari ng aso na pinabayaan na makalabas sa kanilang bakuran ang kanilang aso.
Kapag ang aso ang namamaltrato, awang-awa tayo pero papaano naman ang nangyari kay Joshua? Hindi ito ang unang pagkakataon na may nadisgrasya dahil sa pagtakbo palayo sa mga “siga” ng daan. Ang tanong ng ating kurimaw na mahilig sa pusa, hahayaan na lang bang ganoon ang mangyari kay Joshua? Una, hanapin ang nakabundol sa kaniya at papanagutin. Dapat ding managot at humingi ng paumanhin sa pamilya ni Joshua ang iresponsableng may-ari ng aso.
At higit sa lahat, dapat alisin sa kalye ang mga asong pagala-gala, umaga man o gabi, gaya sa Q.C.
* * *
Bukod sa pagka-adik ng mga kabataan ngayon sa gadgets dahil sa pagkahumaling sa games at social media, may isa pang dapat bantayan mga tsong ang mga magulang sa kanilang mga anak na babad sa internet—ang depresyon.
Sa isang ulat na lumabas kasi kamakailan tungkol sa pag-aaral na ginawa sa Britanya, aba’y lumilitaw daw na nagpapakita ng depressive symptoms ang mga kabataang babad sa social media, lalo na ang mga babae.
Ang pinaniniwalaan dahilan nito ay kakulangan ng tulog, nabibiktima ng online harassment, nawawalan ng kompiyansa sa sarili at sa kanilang hitsura.
Sabi ng ating kurimaw na “Friendster” pa ang huling ginamit na social media, kung tutuusin daw ay hindi lang ang mga kabataan ang nalalantad sa depresyon nang dahil sa social media, kahit daw ang mga may edad na.
May mga matatanda, o propesyonal na at may asawa ang nakararanas din ng depresyon kapag nakakakita ng mga “post” tungkol sa mga bagay na hindi niya nagagawa. Tulad daw halimbawa ng pamamasyal sa ibang lugar, o pagpapakita ng mga bagong gamit ng mga friend niya. Maaaring mas matindi ang epekto ito sa taong may pinagdadaanan sa pamilya o trabaho.
May kakilala nga raw ang ating kurimaw na tumigil na sa pagpagamit ng social media dahil hindi na maganda ang kaniyang pakiramdam sa mga nakikita niyang post ng mga “friend” niya. Tingin daw niya sa mga post ng mga kaibigan ay “nagyayabang” na kapag naglalagay ng mga larawan ng mga biyahe at kapag kumakain sa iba’t ibang restaurant. Naiirita na rin siya sa mga nag-e-emote na post ng iba.
Ang mga nakatatanda, alam nila ang dapat nilang gawin kapag may mali na sa kanilang nararamdaman, eh papaano ang mga kabataan? Kung tama ang naturang pag-aaral sa Britanya at kung masasabing magkapareho ang emosyon ng mga kabataang Pinoy sa mga kabataang Briton, aba’y dapat dagdagan ng mga nakatatanda ang pagbabantay at pagpapayo sa kanila.
At dahil pinagdiriwang ng Romblon province ang kapiyestahan ni Santo Nino simula Enero 9, nagkalat ang mga lasing sa kanto at mga politikong sinamantala ang selebrasyon para makapag-pogi sa darating na eleksyon. Anuman ang kanilang motibo, bahala na si Lord. Ang mahalaga sa Biniray—Hala Bira! Viva Senor!
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
