Bukod sa birthday, karaniwang sa Pasko nagkakaroon ng mga wish o mga hinahangad sa buhay ang mga tao na magkaroon sana ng katuparan. Ngayong Pasko, ano ang wish mo?
Ako, marami. Kasama na rin siyempre ang para pangkalahatan ng mga kababayan natin gaya ng mas magandang buhay at pang-Miss Universe na sagot na “world peace.” Ngunit malamang na marami sa atin ang kasama sa wish list ang mabawasan na ang pesteng trapik.
Aba’y maraming “quality time” ang nasasayang ng marami nating kababayan sa kalye, na sana eh nagagamit nila sa piling ng kanilang mga mahal sa buhay. Ang nangyayari, maagang umaalis ng kani-kanilang bahay ang mga manggagawa para hindi ma-late sa trabaho, pero gabing-gabi na nakakauwi dahil natengga sa trapik.
Kung madami siguro ang nagmamando sa kalye at humuhuli sa mga pasaway na driver, baka kahit papaano eh nababawasan ang trapik. O kaya naman eh dagdagan ang mga kalye na lusutan ng mga sasakyan at paghusayin ang mass transport system. Pero ang laging sinasabing dahilan kaya hindi ito magawa, walang pondo.
Mabuti na lang at napag-uusapan ngayon ang “road user’s tax” o ang buwis na nakokolekta sa mga motorist sa ilalim ng motor vehicle user’s charge (MVUC) na pinamamahalaan ng Road Board. Aba'y kung magagamit ng tama, puwedeng pagkunan ito ng pondo. Sinasabing umaabot na sa higit P166 bilyon ang pondo nito na dapat gamitin sa pagsasaayos at mga security features ng mga kalsada. Pero sa tingin nyo ba ligtas at maayos ang mga kalye natin?
Sinasabing nagiging gatasan ang MVUC dahil nagkakaroon daw ng sabwatan ang ilang tiwaling namamahala ng Road Board at mga mambabatas para magamit ang pondo sa mga distrito nila. Kahit noong buhay pa si dating Senadora Miriam Santiago, binabanatan na niya ang Road Board. At ngayon, may panukalang batas na para buwagin ang board at suportado ito ni President Mayor Rodrigo Duterte.
Ang tanong ng ating kurimaw, sino ang ayaw na mabuwag ang Road Board? Aba’y nanggagaling sa hanay ng ilang mambabatas. Alam na siguro ninyo kung bakit.
Bukod sa pagwalis sa katiwalian sa paggamit ng road user’s tax, aba’y wish din natin na mawala na ang mga bully, tulad sa mga kabataan. Hindi man maganda, pero mabuti na lang at lumabas ang insidente ng pambu-bully umano ng isang karatistang estudyante sa kaniyang mga kapwa estudyante.
Ano nga kaya ang problema ng estudyanteng nambu-bully at pumasok sa kukute niya na manakit at mamahiya ng mga kaklase na mas malaki sa kaniya. Na-bully kaya siya noon kaya gumaganti siya? Inggit kaya siya sa mga mas matataas sa kaniya? O nasulsulan lang ng iba niyang kaklase?
Kung tutuusin, hindi lang si kid bully ang may problema sa kuwentong viral sa social media kung hindi maging ang iba pang estudyante na nakakita sa ginawang pambabarako ng kaklase nila. Wala man lang bang nagsumbong sa pamunuan ng paaralan sa una o ikalawang insidente ng pambu-bully ni kid bully?
Kung wala, o kung mayroon man nagsumbong, mukhang nakakaalpas sa kasalanan niya si kid bully kaya lumakas siguro ang loob at muli pang inulit hanggang sa maglabasan na ang mga video niya. Aba’y nagkaroon kaya rito ng kapabayaan ang kanilang paaralan at ang magulang ni kid bully?
Ang ating kurimaw, wish na matanggal si kid bully sa kaniyang private school at hayaan daw na ma-transfer sa public school sa Payatas area sa Quezon City, o kaya naman eh sa Tundo sa Maynila. Hindi para masukat ang kaniyang tapang sa mga harap ng mga mahihirap na estudyanteng subok na palaban. Sa halip, para lang makita niya kung ano ang sinasayang niya sa kaniyang buhay.
Tandaan: Ang tao'y nilalang na politiko at madalas ang politiko'y nanlilinlang ng tao!
(Twitter: follow@dspyrey)
