Patay ang isang businessman na rider ng motorsiklo matapos na masalpok ng isa pang motorsiklong minamaneho naman ng isang di umano'y lasing na driver.
Kinilala ang nasawi na si Herodion Molina Molo, 55, residente ng Barangay Macalas, Romblon, Romblon.
Ayon kay Police Senior Inspector Gemmie Mallen, Chief of Police ng Romblon Municipal Police Station, bandang 7:05 ng gabi nitong Miyerkules, binabaybay umano ni Molo ang kahabaan ng national road sa Barangay Macalas kasama ang dalawang batang backride ng bigla umano silang salpukin ng motorsiklo na minamaneho ni Herminio Mallen Molina, 52, residente ng parehong Barangay.
Tumilapon mula sa kanilang sasakyan ang mga sakay ng dalawang motorsiklo samantalang si Molo ay nagtamo ng head injury kaya agad na isinugod sa Romblon District Hospital para patingnan ngunit binawian ito ng buhay habang ginagamot.
Samantala, nagtamo naman ng galos sa katawan ang dalawang batang backride ni Molo gayun na rin ang rider na si Molina na agad namang inaresto ng mga tauhan ng Romblon Municipal Police Station matapos ang aksidente.
Sinabi sa police report na mukha di umanong nakainum ang si Molina nang mangyari ang aksidente.
Posibleng maharap sa kasong reckless imprudence resulting to homicide ang suspek na si Molina.
