Matagumpay na isinagawa kamakailan ang Joint Convening Ceremony ng Coast Guard K9 Narcotics Detection Dog at Explosives Detection Dog and Handler Specialization Course sa Training Center nito sa Bgy. Cajimos, Romblon, Romblon.
Panauhing pandangal sa naturang seremonya si Capt. Julius Caesar Victor Marvin V. Lim, Commander, Coast Guard District Southern Tagalog, kung saan kanyang binati ang mga sumailalim sa specialization course upang sanayin at turuan ang mga alagang aso.
Pinasalamatan din ni Capt. Lim ang mga opisyal ng pamahalaang panlalawigan sa patuloy na pagtulong ng mga ito sa programa ng Philippine Coast Guard.
Nasa 20 aso ang sinasanay kada taon ng Coast Guard K9 Group upang maging sniffing dogs sa mga pangunahing pantalan at paliparan sa buong bansa.
Sinanay rin ang mga ito sa search and rescue operation para makatuilong kung sakaling may mangyaring sakuna sa bansa katulad ng lindol at bagyo.
Dumalo rin sa nasabing okasyon si LT. Gerald Anderson, PCG Auxiliary at isang sikat na aktor na pinuri ang mga taga-Romblon dahil sa mainit na pagtanggap sa kanyang pagbisita sa kabisera ng lalawigan.
Kasabay rin ng aktibidad na ito ang paglulunsad ng Philippine Coast Guard sa Fish Refuge and Sanctuary na matatagpuan sa Sitio Agbaliling, Bgy. Cajimos, Romblon. (CLJD/DMM-PIA MIMAROPA)
