Inaasahang lalabas na ngayong araw ang unang Covid-19 patient ng Romblon na naka-admit sa Dr. Rafael S. Tumbokon Memorial Hospital (DRSTMH) sa Aklan , ito ay ayon sa Romblon Provincial Health Office.
Matapos lumabas ang test noong nakaraang Miyerkules na nagpapatunay na negative na sa virus ang German national mula sa San Jose, pinayagan na itong lumabas ng ospital at inaasahang makakauwi na ng isla ng Carabao.
“Pinayagan na siya ng ospital, at nakipag-ugnayan na rin ang LGU at ang RHU ng San Jose para sa paglipat sa kanya pabalik ng San Jose. Tayo na ang gagawa ng confirmatory test sa kanya para masigurong negative na talaga siya sa virus,” ayon kay Dra. Ederlina Aguirre ng PHO-Romblon.
Samanatala, ayon kay San Jose Mayor Ronnie Samson, nagpadala na sila ng susundo sa German national at ito umano ay ididiretso sa kanyang bahay pagdating ng bayan.
“Naka-isolate parin naman siya ng 14 days, kasi protocol nga natin na lahat ng galing sa ibang probinsya ay isasailalim ng 14 days. Hindi parin siya pwede lumabas siyempre,” ayon sa alkalde.
