Nagpahayag ng pagkabahala ang Altai Philippines Mining Corporation (APMC) sa naging desisyon ng Sangguniang Bayan ng San Fernando na bawiin ang nauna nitong pag-endorso sa mining project ng kumpanya sa Barangay España, at sinabing nakahanda itong gamitin ang lahat ng legal at administratibong remedyo na pinapahintulutan ng batas.
Sa inilabas na pahayag, sinabi ng APMC na ang Resolution No. 297, na nagbigay ng paborableng pag-endorso sa kanilang proyekto noong Hulyo 17, ay dumaan umano sa wastong legal at regulatory processes, isinailalim sa deliberasyon ng Sangguniang Bayan, at inaprubahan ng mayorya ng mga miyembro nito.
Ayon sa kumpanya, nakababahala umano ang naging hakbang ng ilang miyembro ng Sangguniang Bayan na bawiin ang naturang resolusyon makalipas lamang ang halos dalawang linggo. Iginiit ng APMC na ang mabilis na pag-withdraw sa endorsement ay nagbubukas ng mga katanungan hinggil sa mga pangyayaring nagbunsod sa naturang hakbang.
Dahil dito, sinabi ng kumpanya na nakalaan ang lahat ng legal at administratibong remedyo upang mapangalagaan ang kanilang mga karapatan sa ilalim ng batas at upang mapanagot ang sinumang mapatutunayang responsable kung kinakailangan.
Iginiit din ng APMC na nananatili itong nakatuon sa pagsusulong ng responsableng pagmimina, pangangalaga sa kapaligiran, at pakikipagtulungan sa mga host communities, kasabay ng pagsunod sa umiiral na mga batas at regulasyon.
Matatandaang noong August 3, inaprubahan ng Sangguniang Bayan ng San Fernando ang isang resolusyon na nagre-recall at nagwi-withdraw sa Resolution No. 297, Series of 2026, na nagbigay ng paborableng pag-endorso sa aplikasyon ng APMC para sa operasyon nito sa ilalim ng Mineral Production Sharing Agreement (MPSA) sa Barangay España. Kasabay nito, itinakda rin ng bagong resolusyon ang pagsasagawa ng karagdagang public consultations at iba pang environmental, social, at economic studies bago gumawa ng anumang susunod na hakbang kaugnay ng proyekto.
