Nakinabang ang mga miyembro ng Sibuyan Mangyan Taga-Bukid sa Sitio Talaba (Ormok), Barangay Taclobo, San Fernando sa isang community outreach program at information drive na isinagawa ng San Fernando Municipal Police Station (MPS) katuwang ang Lokal na Pamahalaan ng San Fernando bilang bahagi ng pagdiriwang ng 31st Police Community Relations (PCR) Month noong July 30.
Pinangunahan ni PLT Romel R. Rutor, Officer-in-Charge ng San Fernando MPS, kasama ang pamahalaang bayan sa pamumuno ni Mayor Fernando U. Marin, ang aktibidad na naglalayong palakasin ang kamalayan ng komunidad sa usapin ng kapayapaan at kaayusan, gayundin ang pangangalaga sa kababaihan at mga bata.
Kabilang sa mga tinalakay sa information drive ang kampanya ng Philippine National Police laban sa terorismo, Republic Act No. 9262 o Anti-Violence Against Women and Their Children Act, Republic Act No. 11930 o Anti-Online Sexual Abuse or Exploitation of Children and Anti-Child Sexual Abuse or Exploitation Materials Act, at mga umiiral na municipal ordinances.
Bahagi rin ng programa ang pamamahagi ng tulong sa mga miyembro ng komunidad bilang suporta sa kanilang pang-araw-araw na pangangailangan.
Ayon sa Romblon Police Provincial Office, ang aktibidad ay bahagi ng Peace and Order and Public Safety Plan ng lokal na pamahalaan na naglalayong mailapit ang mga serbisyo ng gobyerno sa mga liblib na komunidad sa pamamagitan ng edukasyon, public service, at community engagement.
Binigyang-diin naman ni Romblon PPO Provincial Director PCOL Rexton F. Sawi ang kahalagahan ng patuloy na pakikipag-ugnayan sa mga komunidad.
“This outreach program reflects the true essence of Police Community Relations—building trust, extending compassion, and ensuring that even our farthest communities feel the presence and care of the government. Through sustained collaboration with our local government partners, we remain steadfast in protecting women and children, promoting peace and security, and bringing the services of the Philippine National Police closer to every Filipino,” ani Sawi.
