Naglabas ng isang pinagsamang pahayag ang mga Indigenous Peoples Mandatory Representatives (IPMRs), Indigenous Political Structures (IPS), Councils of Elders, mga pinunong tribal, at mga kasapi ng Bantoanon, Ati, at Sibuyan Mangyan Tagabukid Indigenous Cultural Communities sa lalawigan ng Romblon upang tutulan ang large-scale metallic mining sa Sibuyan Island at sa iba pang bahagi ng lalawigan.
Sa kanilang pahayag na inilabas noong Hulyo 21, sinabi ng mga lumagda na ang kanilang paninindigan ay nakabatay sa pangangalaga sa buhay ng tao, mga tahanan, kabuhayan, kultura, ancestral heritage, at sa sangnilikha ng Diyos na kanilang minana mula sa kanilang mga ninuno.
Ayon sa kanila, ang mga kagubatan, kabundukan, watershed, ilog, dagat, at iba pang likas na yaman ng Romblon ay magkakaugnay at mahalagang bahagi ng kanilang pagkakakilanlan, kasaysayan, at espiritwal na pamumuhay bilang mga Katutubo.
Iginiit din ng grupo na dahil ang Romblon ay binubuo ng maliliit na isla na may maseselang ecosystem, kinakailangang pairalin ang pinakamataas na antas ng pag-iingat bago pahintulutan ang anumang large-scale metallic mining sa lalawigan.
Nakasaad din sa pahayag na bagama't ang ilang iminungkahing mining area ay wala sa loob ng Certificate of Ancestral Domain Title (CADT), maaari pa rin umanong maapektuhan ng mga operasyon ang mga watershed, biodiversity, pinagkukunan ng tubig, kabuhayan, at kultura ng mga katutubo at iba pang komunidad.
Binigyang-diin din ng mga lumagda ang kahalagahan ng pagpapatupad ng Indigenous Peoples' Rights Act of 1997 (Republic Act No. 8371) at ang paggalang sa proseso ng Free, Prior and Informed Consent (FPIC) kung kinakailangan sa ilalim ng batas.
Sa kanilang limang-puntong paninindigan, mariin nilang ipinahayag ang pagtutol sa large-scale metallic mining sa Sibuyan Island at sa iba pang bahagi ng Romblon, at nanawagan sa National Commission on Indigenous Peoples (NCIP), Department of Environment and Natural Resources (DENR), Mines and Geosciences Bureau (MGB), mga lokal na pamahalaan, at iba pang ahensya ng gobyerno na mahigpit na ipatupad ang mga batas na nagpoprotekta sa kalikasan at sa karapatan ng mga Katutubo.
Hinikayat din nila ang mga Romblomanon, mga simbahan, civil society organizations, environmental advocates, akademya, at iba pang sektor ng lipunan na magkaisa sa pangangalaga sa kagubatan, kabundukan, ilog, dagat, biodiversity, at mga komunidad ng lalawigan.
Kasabay nito, sinabi ng grupo na hindi sila tutol sa kaunlaran, ngunit isinusulong nila ang mga proyektong nakabatay sa sustainable development tulad ng agrikultura, pangisdaan, ecotourism, renewable energy, climate resilience, edukasyon, at iba pang kabuhayang hindi nakasisira sa kalikasan.
