Batay sa ulat ng ahensya, ang pagtaas ng inflation ay pangunahing bunsod ng mas mabilis na pagtaas ng presyo ng food and non-alcoholic beverages, alcoholic beverages and tobacco, clothing and footwear, at recreation, sport and culture.
Ayon kay Engr. Johnny Solis, Chief Statistical Specialist ng PSA-Romblon, kabilang din sa mga nag-ambag sa pagtaas ng inflation ang mas mataas na presyo ng transportasyon, partikular ng gasolina, diesel, at pamasahe.
Sinabi rin ni Solis na tumaas ang presyo ng mga pangunahing pagkain tulad ng bigas, isda, karne, frozen meat, at mga prutas, na higit na nakaapekto sa gastusin ng mga kabahayan.
Ipinaliwanag din ni Solis na isa sa mga dahilan ng pagmahal ng mga bilihin sa lalawigan ay ang pagtaas ng shipping costs at presyo ng krudo, na may direktang epekto sa halaga ng mga produktong ibinibiyahe papasok sa Romblon.
Iniulat din ng ahensya na umakyat sa 134.70 ang Consumer Price Index (CPI) ng lalawigan. Nangangahulugan ito na ang isang basket ng mga produkto at serbisyong nagkakahalaga ng ₱100 noong 2018 (base year) ay nagkakahalaga na ngayon ng ₱134.70.
Sa kabila ng pagtaas, nananatiling mas mababa ang inflation rate ng Romblon kumpara sa 5.2 porsyentong inflation rate ng buong MIMAROPA noong Hunyo.
Ayon pa kay Solis, higit na nararamdaman ng mga pamilyang kabilang sa bottom 30 percent income households ang epekto ng inflation dahil malaking bahagi ng kanilang kita ay napupunta sa pagkain at iba pang pangunahing pangangailangan.
“Dahil halos buong kita ng mga pamilyang ito ay napupunta lamang sa pagkain at mga pangunahing pangangailangan, ang 4.0% na inflation ay nangangahulugang mas maliit na ang nabibili ng kanilang piso kumpara noong nakaraang buwan at nakaraang taon,” ayon kay Solis.
Discussion about this post