Tumanggap ng fuel subsidy, mga kagamitang pangisda, at life jackets ang mga rehistradong mangingisda sa bayan ng Looc sa isinagawang ikaapat na batch ng pamamahagi ng Bureau of Fisheries and Aquatic Resources (BFAR) ngayong Hunyo.
Ayon sa BFAR at Municipal Coastal Resource Office (MCR), kabuuang 77 mangingisda ang nakatanggap ng tig-₱3,000 fuel subsidy sa pamamagitan ng debit cards na maaari lamang gamitin sa pagbili ng gasolina o diesel para sa kanilang pangingisda.
Bukod dito, 36 na mangingisda ang pinagkalooban ng hook-and-line fishing gear habang anim na set ng bottom gillnets ang ipinamahagi upang makatulong sa kanilang operasyon sa pangingisda.
Namahagi rin ang ahensya ng 50 life jackets bilang bahagi ng mga hakbang para sa kaligtasan ng mga mangingisda sa dagat.
Pinangunahan ang aktibidad ni Municipal Coastal Resource Officer Susan Noche kasama si BFAR representative Aiko Tabuna-Fajarito na kumatawan kay Officer-in-Charge Provincial Fishery Officer Luisito M. Manes.
Ayon sa BFAR, ito na ang ikaapat na bugso ng pamamahagi ng tulong para sa mga mangingisda sa Looc sa ilalim ng patuloy na assistance program ng ahensya.
Kabilang sa mga naunang pamamahagi ang fuel subsidy at iba't ibang kagamitang pangisda bilang suporta sa kabuhayan ng mga benepisyaryo.
Bahagi ang programa ng mas malawak na inisyatiba ng BFAR upang matulungan ang mga komunidad na nakadepende sa pangingisda sa Romblon sa pamamagitan ng pagbibigay ng mga kagamitang makatutulong sa kanilang produksyon at kaligtasan habang nasa dagat.
Discussion about this post