Magkakaloob ang pamahalaan ng hanggang ₱20,000 Service Recognition Incentive (SRI) para sa lahat ng kwalipikadong kawani ng gobyerno ngayong 2025, matapos lagdaan ni Pangulong Ferdinand R. Marcos Jr. ang Administrative Order No. 40.
Ayon sa Palasyo, layunin ng insentibo na kilalanin ang patuloy na serbisyo, sipag, at kontribusyon ng mga empleyado sa pagtupad ng mga layunin ng Philippine Development Plan 2023-2028 at 8-Point Socioeconomic Agenda ng administrasyon.
Sakop ng SRI ang mga empleyado sa Executive branch, kabilang ang regular, contractual, at casual personnel sa mga national government agency, state universities and colleges, at GOCCs. Kasama rin ang mga sundalo ng AFP at mga uniformed personnel ng PNP, BFP, BJMP, PPSC, BuCor, Coast Guard, at NAMRIA.
Ang SRI ay maaaring maibigay simula December 15.
Ang pondo para sa insentibo ay magmumula sa kani-kanilang 2025 Personnel Services budget, o sa MOOE kung kinakapos. Para naman sa GOCCs at Local Water Districts, manggagaling ito sa kanilang corporate operating budget.
Pinapayagan ding magbigay ang Senado, Kamara, Hudikatura, Office of the Ombudsman, at iba pang constitutional offices ng sariling SRI hanggang ₱20,000 depende sa kanilang pondo.
Para sa mga local government unit, kabilang ang barangay, ang halaga ng SRI ay ibabatay sa kapasidad na pinansyal ng bawat LGU.
Makakatanggap ng buong insentibo ang mga empleyadong nasa serbisyo hanggang November 30, 2025 at may higit apat na buwang aktwal na serbisyo sa taon. Pro-rated naman ang matatanggap ng may mas maikling tenure.
Hindi naman kwalipikado ang mga nakatanggap na ng iba pang year-end benefits na lampas sa pinapayagan sa batas.
