Nilinaw ng Department of Agrarian Reform (DAR) MIMAROPA na mananatili silang nakatuon sa pagtatanggol at pagsusulong ng karapatan ng mga agrarian reform beneficiaries (ARB), tenant-lessees, farmworkers, at mga aktwal na magsasaka, sa gitna ng mga usaping bumabalot sa 319 ektaryang Buyco Estate sa mga bayan ng Odiongan at Ferrol, Romblon.
Sa inilabas na opisyal na pahayag, sinabi ng ahensya na ang mga sensitibong isyu kaugnay ng Buyco Estate ay saklaw ng hudikatura at hindi ng DAR.
Ipinaliwanag nila na tanging korte ang may kapangyarihang magpasya sa mga kasong may kinalaman dito, lalo na’t may nauna nang kautusan ang DAR na nagsasabing hindi sakop ng Comprehensive Agrarian Reform Program (CARP) ang naturang estate.
Dagdag pa ng DAR, anumang pahayag o kilos na nagmumula sa mga empleyado ng DAR Romblon Provincial Office na taliwas o hindi naaayon sa mandato ng ahensya hinggil sa Buyco Estate ay hindi dapat ituring na opisyal na posisyon ng kagawaran at hindi rin ito nagbubuklod sa DAR.
Tiniyak ng pamunuan ng DAR MIMAROPA na kanilang haharapin sa tamang forum ang anumang maling gawain o asal ng kanilang mga kawani, lalo na kung ito ay makikitang may conflict of interest o nakasasama sa interes ng publiko, alinsunod sa batas.
Kasabay nito, nanawagan ang DAR MIMAROPA sa lahat ng panig na sangkot sa isyu na lutasin ang sigalot sa mapayapang paraan at may pagsunod sa batas. Binibigyang-diin ng ahensya na dapat manaig ang katarungan, malasakit, at paggalang sa dignidad ng bawat tao sa lahat ng hakbang kaugnay ng usapin.
