Muling itinalaga si Romblon Lone District Representative Eleandro Jesus “Budoy” Madrona bilang Chairman ng House Committee on Tourism sa pagbubukas ng ika-20 Kongreso ng House of Representatives.
Ito na ang ikalawang sunod na termino ni Cong. Madrona bilang pinuno ng komiteng tumututok sa mga panukalang batas at polisiya na may kinalaman sa pagpapaunlad ng industriya ng turismo sa bansa. Siya rin ang nagsilbing chairman ng komite sa panahon ng 19th congress.
Sa kanyang muling pagkakatalaga, inaasahang ipagpapatuloy ni Madrona ang pagtutulak ng mga reporma upang palakasin pa ang turismo bilang isa sa pangunahing economic drivers ng bansa, lalo na sa probinsya ng Romblon na kilala sa mga natural na destinasyon.
Malaki rin ang naging ambag ni Madrona sa pag-apruba ng mga batas at programa na nakatuon sa sustainable tourism development, pagpapalawak ng tourism infrastructure, at promosyon ng mga lokal na destinasyon sa internasyonal na merkado.
Sa ilalim ng kanyang pamumuno noong 19th congress, naging aktibo ang komite sa mga konsultasyon sa stakeholders at local government units upang masigurong inclusive at responsive ang mga hakbang para sa turismo, lalo na sa post-pandemic recovery ng sektor.
Inaasahan na sa kanyang bagong termino, lalo pang paiigtingin ng mambabatas mula Romblon ang pagtutok sa mga probinsyang may malaking potensyal sa turismo, at ang pagtutulungan ng gobyerno at pribadong sektor upang makalikha ng mas maraming trabaho at oportunidad para sa mga Pilipino.
