Idinaos ang isang medical lecture na may temang “Updates in Type 2 Diabetes Management and Thyroid Disorders in Primary Care” sa Conference Hall ng Romblon Provincial Hospital bilang bahagi ng pagsusumikap na palawakin ang kaalaman ng mga healthcare professionals sa lalawigan.
Inorganisa ito ni Dr. Jay M. Ortiz, Internal Medicine Practitioner ng Romblon, katuwang ang Romblon Medical Society, Provincial Health Office – Romblon, at Corbridge Pharmaceuticals. Layunin ng aktibidad na maihatid ang pinakabagong gabay at praktikal na kaalaman sa pangangasiwa ng diabetes at thyroid disorders, mga kundisyong kalusugan na madalas tinutugunan sa primary care setting.
Pangunahing tagapagsalita si Dr. Jay S. Fonte, Head ng Department of Internal Medicine sa Ospital ng Makati (OSMAK) at isang endocrinologist. Ibinahagi niya ang makabagong rekomendasyon sa paggamot ng Type 2 Diabetes at pangangasiwa ng iba’t ibang kondisyon ng thyroid.
Nagbigay rin ng presentasyon si Dr. Roda Falcutila, isang Nephrologist sa lalawigan, na tinalakay ang renal disease management na mahalaga sa pangangalaga ng mga pasyenteng may metabolic conditions.
Dinaluhan ng mga doktor, municipal health officers, nurses, at iba pang healthcare professionals mula sa iba’t ibang bayan ng Romblon, naging daan ang aktibidad sa pagpapalitan ng kaalaman at pagtutulungan para sa patuloy na pagpapabuti ng serbisyong medikal sa lalawigan.
