Paiigtingin ng Department of Environment and Natural Resources (DENR) at Department of Justice (DOJ) ang kanilang koordinasyon upang mas mapalakas ang paghahain at pag-usig sa mga kasong may kaugnayan sa paglabag sa mga batas pangkalikasan.
Ayon kay DENR Assistant Secretary Atty. Norlito A. Eneran, bagama’t may mga kasong isinampa laban sa mga umano’y lumalabag sa batas pangkalikasan na nauuwi sa dismissal o pag-absuwelto sa aspetong kriminal, hindi ito naging hadlang upang ipagpatuloy ng ahensya ang paghahanap ng pananagutan.
Sa isang kasong ibinahagi ni Eneran, bagama’t na-dismiss at na-absuwelto ang mga akusado sa criminal aspect, naisulong pa rin ng DENR ang civil aspect ng kaso na nagresulta sa pagpapataw ng halos ₱1.7 milyon na multa.
Sinabi rin ni Eneran na inaasahang mapapalakas pa ang paghahain ng mga environmental case sa tulong ng DOJ Department Circular No. 20-B.
Sa ilalim ng direktiba, mas maagang nakikipag-ugnayan ang mga prosecutor sa DENR sa yugto pa lamang ng imbestigasyon upang matukoy ang mga kakulangan sa ebidensya at iba pang usaping maaaring makaapekto sa paghahain ng kaso.
Samantala, nilinaw din ng mga opisyal ang usapin hinggil sa mga tulong o benepisyong ibinibigay ng mga kumpanya ng pagmimina sa mga komunidad.
Ayon sa kinatawan ng DENR, nakapaloob sa Social Development and Management Program (SDMP) ang mga programang pangkomunidad na ipinagkakaloob ng mga mining company, alinsunod sa Republic Act No. 7942 o Philippine Mining Act of 1995.
Hindi umano unilateral na ipinapatupad ng kumpanya ang mga naturang programa, dahil ito ay pinag-uusapan at pinagtutulungan kasama ang Local Government Unit (LGU). Ang mga programa ay regulado rin at regular na iniuulat sa Mines and Geosciences Bureau (MGB) para sa monitoring at pagpapatupad.
Samantala, pinasalamatan ni DENR MIMAROPA Regional Executive Director Felix Mirasol Jr. ang lokal na pamahalaan sa paghahatid ng mga concern nito sa DENR Central Office.
Ayon kay Mirasol, naging daan ang hakbang ng pamahalaang panlalawigan upang personal na bumisita sa lugar ang grupo ni Asec. Eneran at ma-validate ang mga isyung kinakaharap ng komunidad.
Binigyang-diin din niya ang kahalagahan ng patuloy na koordinasyon sa mga miyembro ng Provincial Board at mga alkalde upang matugunan ang mga usaping may kaugnayan sa pangangalaga ng kalikasan.
Discussion about this post