Mahigit 100 Agrarian Reform Beneficiaries (ARBs) at iba pang mamamayan ang nakinabang sa libreng legal consultation na isinagawa ng Department of Agrarian Reform (DAR)-Romblon sa ilalim ng programang “Lawyers to the Beneficiary” sa Alcantara, Romblon noong September 24.
Layunin ng programa, na inisyatiba ng DAR Regional Office MIMAROPA, na mailapit sa mga ARB ang libreng serbisyong legal para sa mga usaping may kaugnayan sa kanilang mga lupang sinasaka at iba pang agrarian concerns.
Pinangunahan ni Provincial Agrarian Reform Program Officer II Engr. Rogelio D. Madarcos, ang aktibidad kasama ang iba pang opisyal ng DAR Romblon.
Sa pamamagitan ng DAR Legal Division/LTS, nabigyan ng libreng konsultasyon at legal na gabay ang mga dumalong ARB at iba pang mamamayan hinggil sa kanilang mga katanungan at suliraning may kaugnayan sa lupa.
Ayon kay Madarcos, mahalaga ang ganitong programa upang makatulong sa pagtugon sa mga hindi pagkakaunawaan at iba pang concerns ng mga benepisyaryo, gayundin sa pagpapanatili ng kapayapaan at pagkakaisa sa mga komunidad.
Sa pamamagitan ng “Lawyers to the Beneficiary,” direktang inilalapit ng DAR ang serbisyong legal sa mga magsasaka upang mabigyan sila ng agarang gabay sa mga usaping agrarian.
Inaasahan ding makatutulong ang programa upang mabawasan ang gastusin at pangangailangan ng mga benepisyaryo na bumiyahe pa patungo sa mga tanggapan ng DAR para lamang makahingi ng legal na tulong.
Discussion about this post