Ligtas na nailigtas ng mga tauhan ng Philippine Coast Guard (PCG) ang isang 31-anyos na mangingisda matapos lumubog ang kanyang motorbanca sa karagatan, humigit-kumulang anim na nautical miles mula sa Barangay Cambijang, Cajidiocan, Romblon kahapon, August 13.
Nakilala ang mangingisda na si Rommel Roco, residente ng Sitio Ilawod, Barangay Cambijang.
Ayon sa ulat ng Coast Guard Sub-Station (CGSS) Cajidiocan, nakatanggap sila ng ulat bandang alas-3:40 ng hapon mula sa kaibigan nito na humingi ng agarang tulong matapos lumubog at maanod ang motorbanca na sinasakyan ni Roco.
Agad na nakipag-ugnayan ang CGSS Cajidiocan sa Municipal Disaster Risk Reduction and Management Office (MDRRMO) Cajidiocan at nagsagawa ng search and rescue (SAR) operation.
Bandang alas-4:50 ng hapon, namataan ng SAR team ang lumubog at inaanod na motorbanca sa katubigan ng Barangay Cambijang. Bandang alas-5:33 ng hapon, matagumpay nilang nailigtas si Roco.
Binigyan siya ng thermal blanket, tubig at pagkain at isinailalim sa assessment. Wala naman siyang iniulat na pinsala o anumang masamang kondisyon sa kanyang katawan.
Nakuha rin at hinila patungo sa Port of Cajidiocan ang lumubog na motorbanca.
Sa paunang salaysay ni Roco, umalis siya sa Barangay Cambijang bandang alas-6 ng umaga upang mangisda. Bandang alas-3:20 ng hapon, habang hinihila niya ang kanyang lambat at pauwi na, umano’y tinamaan ng isang marine animal na pinaniniwalaan niyang pating ang kanyang motorbanca.
Dahil sa impact, nagkaroon umano ng butas sa gilid ng bangka na naging dahilan ng pagpasok ng tubig hanggang sa tuluyang lumubog ito.
Nang mapansin ni Roco na lumulubog na ang kanyang bangka, kinuha niya ang kanyang cellphone at nakipag-ugnayan sa kanyang pamilya upang ipaalam ang kanyang kinaroroonan at humingi ng tulong. Agad namang nakipag-ugnayan ang pamilya sa mga awtoridad.
Bandang alas-7:15 ng gabi, ligtas na nakabalik sa Port of Cajidiocan ang SAR team kasama si Roco.
Discussion about this post