Tumanggap ng educational assistance ang 37 mag-aaral sa Cajidiocan mula sa lokal na pamahalaan bilang suporta sa kanilang pag-aaral at work immersion.
Ayon kay Marie Antoinette Perez ng Municipal Social Welfare and Development Office (MSWDO), inilaan para sa programa ang ₱125,000 mula sa Gender and Development (GAD) fund sa ilalim ng Special Program for Employment of Students (SPES).
Ang mga benepisyaryo ay pawang Grade 12 students na kabilang sa Work Immersion Program. Ayon kay Perez, ang halaga ng tulong na natanggap ng bawat mag-aaral ay ibinatay sa kanilang kasalukuyang kalagayan, batay sa pagsusuri ng lokal na pamahalaan.
Nagsimula pa noong nakaraang taon ang naturang programa, ngunit naantala ang pamamahagi habang kinukumpleto ang mga kinakailangang dokumento at lagda ng mga benepisyaryo bago mailabas ang pondo.
Matapos makumpleto ang mga proseso, agad na ipinatawag ang mga kwalipikadong mag-aaral sa Municipal Treasurer’s Office upang direktang matanggap ang kanilang educational assistance.
Discussion about this post