Naghain ang mga regional councils para sa kapakanan ng mga bata sa MIMAROPA ng mga panandalian at pangmatagalang hakbang upang mapigilan ang karahasan, pambu-bully, at iba pang seryosong insidente sa mga paaralan at komunidad kasunod ng naganap na pamamaril sa isang paaralan sa Tacloban City noong nakaraang buwan.
Tinalakay ang mga rekomendasyon sa Joint Second Quarter Virtual Meeting ng Regional Juvenile Justice and Welfare Committee (RJJWC), Regional Committee on Disability Affairs (RCDA), at Regional Sub-Committee for the Welfare of Children (RSCWC) noong July 8.
Ayon kay Department of Social Welfare and Development (DSWD)-MIMAROPA Regional Director at RJJWC Chairperson Benchie B. Gonzales, layunin ng mga panukala na higit pang mapalakas ang child protection sa pamamagitan ng mas maigting na koordinasyon ng mga ahensya tulad ng DSWD, Department of Education (DepEd), at Department of the Interior and Local Government (DILG).
Kabilang sa mga iminungkahing hakbang ng DSWD ang pagsasama ng mga paksa tungkol sa positive parenting, responsableng paggamit ng gadgets at internet, at Juvenile Justice and Welfare Act (Republic Act No. 9344) sa Family Development Sessions (FDS) ng Pantawid Pamilyang Pilipino Program (4Ps).
Plano rin ng ahensya na isama sa Youth Development Sessions (YDS) ang mga aralin tungkol sa life skills, self-awareness, mental health, Anti-Bullying Act, at RA 9344, gayundin ang pagbibigay ng technical assistance sa mga lokal na pamahalaan para sa pagpapatupad ng Parent Effectiveness Service (PES).
Samantala, hinihikayat ang DepEd na mahigpit na ipatupad ang DepEd Order No. 006, Series of 2026, na nagtatakda ng mga alituntunin upang matiyak ang ligtas at maayos na kapaligiran sa mga paaralan.
Kabilang din sa mga rekomendasyon ang pagpapalakas sa papel ng Parents-Teachers Associations (PTAs) bilang katuwang sa child protection, pagsasagawa ng tuloy-tuloy na information campaigns laban sa bullying at hinggil sa responsableng paggamit ng internet, regular na inspeksyon ng mga school bag, at pagtatatag ng mga kumpidensyal na reporting mechanisms tulad ng drop boxes, online reporting platforms, at child help desks.
Inaasahan namang paiigtingin ng DILG ang pagsunod ng mga barangay at lokal na pamahalaan sa pagpapanatili ng mga gumaganang Local Councils for the Protection of Children (LCPCs) upang higit pang mapalakas ang mga programang nagpoprotekta sa mga bata sa antas ng komunidad.
Ayon kay Gonzales, ang mga iminungkahing hakbang ay naglalayong maiwasan ang karahasang kinasasangkutan ng mga bata at kabataan sa pamamagitan ng mas aktibong partisipasyon ng pamilya, mas ligtas na kapaligiran sa mga paaralan, at mas matatag na mekanismo ng child protection sa mga komunidad.
