Maaari nang makapag-avail ng low-interest housing loans ang mga minimum wage earners at first-time homebuyers sa ilalim ng Pambansang Pabahay para sa Pilipino Program o 4PH ng pamahalaang nasyonal.
Sa panayam sa programang Arangkada MIMAROPA ng Philippine Information Agency at Radyo Pilipinas-Palawan noong Mayo 20, sinabi ni Mark Sean Arjona na layunin ng programa na matulungan ang mga manggagawang Pilipino na magkaroon ng abot-kayang pabahay sa pamamagitan ng mababang interest rates at government subsidies.
Ayon kay Arjona, nasa tatlong porsyento lamang kada taon ang interest rate sa ilalim ng 4PH program, mas mababa kumpara sa karaniwang housing loan rates ng Home Development Mutual Fund o Pag-IBIG Fund na nasa 5.75% hanggang 6%.
Ipinaliwanag niya na ang programa ay para lamang sa mga first-time homebuyers na walang pagmamay-aring bahay o real estate property at may hindi bababa sa 12 buwan na hulog sa Pag-IBIG.
Dagdag pa niya, kinakailangang ang kukuning housing unit ay bahagi ng socialized housing projects ng mga developers na may lisensya para magbenta ng socialized housing units.
Sa ilalim ng programa, maaaring umutang ng hanggang ₱950,000 para sa horizontal housing projects at hanggang ₱1.8 milyon naman para sa vertical housing developments.
Sinabi rin ni Arjona na pangunahing target ng programa ang mga minimum wage earners at mga ordinaryong manggagawang Pilipino upang mas marami ang magkaroon ng sariling bahay.
Ayon sa Pag-IBIG, maaaring tumagal ng hanggang limang taon ang subsidy ng pamahalaan sa 3% annual interest rate.
Para sa rehiyon ng MIMAROPA, itinakda sa ₱34,600 ang monthly income ceiling ng mga maaaring makinabang sa programa habang ₱42,000 naman sa National Capital Region.
Samantala, tiniyak naman ni Ferdinand R. Marcos Jr. na magpapatuloy ang pagpapatupad ng national housing program sa kabila ng iba’t ibang hamon na kinakaharap ng bansa kabilang ang energy crisis.
Ayon sa Pangulo, patuloy na prayoridad ng administrasyon ang pagbibigay ng disenteng pabahay sa mga pamilyang Pilipino sa pamamagitan ng 4PH program.
Layunin ng programa na matulungan ang mas maraming Pilipino na magkaroon ng permanenteng tirahan lalo na ang mga pamilyang matagal nang walang sariling bahay o hirap maka-access ng abot-kayang pabahay.
