Ipinahayag na ang mga nagwagi sa NBA Individual Awards para sa Season 2025–2026 kasabay ng kasalukuyang Conference Finals ng National Basketball Association.
Muling nasungkit ni Shai Gilgeous-Alexander ng Oklahoma City Thunder ang Most Valuable Player (MVP) award—ikalawang sunod niyang panalo matapos ding maghari noong nakaraang season. Tinalo niya sa botohan sina Nikola Jokic ng Denver Nuggets at Victor Wembanyama ng San Antonio Spurs.
Hindi naman umuwi ng luhaan si Wembanyama matapos makuha ang Defensive Player of the Year, habang si Cooper Flagg ng Dallas Mavericks ang itinanghal na Rookie of the Year. Si Keldon Johnson ng Spurs ang Sixth Man of the Year, si Nickeil Alexander-Walker ng Atlanta Hawks ang Most Improved Player, at si Joe Mazzulla ng Boston Celtics ang Coach of the Year.
Sa All-NBA First Team, nanguna sina Jokic, Luka Doncic ng Los Angeles Lakers, Gilgeous-Alexander, Cade Cunningham ng Detroit Pistons, at Wembanyama.
Samantala, umabot na sa Finals ang New York Knicks matapos dominahin ang Eastern Conference. Winalis nila ang Philadelphia 76ers sa semifinals at ang Cleveland Cavaliers sa Conference Finals, matapos ding talunin ang Atlanta Hawks sa unang round.
Ito ang unang Finals appearance ng Knicks matapos ang 27 taon mula noong 1999, kung saan natalo sila sa San Antonio Spurs.
Sa Western Conference, nagpapatuloy ang dikitang laban sa pagitan ng Oklahoma City Thunder at San Antonio Spurs, kung saan ang magwawagi ay haharap sa Knicks para sa kampeonato.
