Idineklara ni Romblon Mayor Gerard Montojo bilang Special Non-Working Municipal Holiday ang Enero 9, 2026 sa bayan ng Romblon upang mabigyan ng pagkakataon ang mga residente na makiisa sa pagdiriwang ng Biniray Festival 2026 at sa kapistahan ni Señor Sto. Niño de Romblon, ayon sa ulat ng PIA Romblon.
Sa naturang petsa sisimulan ang tradisyunal na “Ton-Ton”, kung saan ibinababa mula sa altar ng St. Joseph Cathedral ang imahe ng Sto. Niño upang ilibot sa iba’t ibang bahagi ng bayan bilang hudyat ng opisyal na pagsisimula ng kapistahan.
Ang Biniray Festival ay isa sa pinakamahalagang relihiyoso at kultural na pagdiriwang sa lalawigan ng Romblon, tampok ang debosyon kay Sto. Niño, makukulay na parada, sayawan sa lansangan, at mga gawaing nagbubuklod sa komunidad.
Inaasahan ang dagsa ng mga deboto, turista, at mga Romblomanon mula sa iba’t ibang lugar ng bansa upang makibahagi sa makabuluhang pagdiriwang na sumasalamin sa pananampalataya, kultura, at pagkakaisa ng bayan.
