Isinusulong ng Department of Tourism (DOT) MIMAROPA ang mas makabuluhang karanasan sa turismo sa Romblon sa pamamagitan ng pagpapakilala ng marble tours at hands-on marble carving experience, kasabay ng patuloy na pag-usbong ng experiential tourism na patok lalo na sa mga kabataang turista.
Ayon kay DOT MIMAROPA OIC-Regional Director Roberto Alabado III, nagbago na ang takbo ng turismo, lalo na sa henerasyon ngayon.
“Sa turismo po, hindi na uso ‘yung nakikita lang. Dati, okay na makunan mo lang ng larawan, pero ngayon sa ating mga Gen Z, hindi na sapat ang basta makita—gusto na nila ay may nagagawa sila,” pahayag ni Alabado.
Binigyang-diin ni Alabado na mahalagang pag-isipan kung ano ang aktibong karanasan na maaaring ialok sa mga turistang bumibisita sa Romblon, partikular pagdating sa marmol na siyang pangunahing identidad ng lalawigan.
“So ano ang puwedeng gawin sa marble pag dumating sila dito? ‘Yun ang pag-isipan natin. Meron dapat tayong marble tours,” aniya.
Hinalintulad niya ito sa wood carving industry ng Paete, Laguna, kung saan kilala ang lugar dahil sa aktwal na karanasan ng mga turista sa pag-ukit ng kahoy.
“Dito po sa atin, kapag sinabing pupunta sila sa Romblon, sana ay makatikim naman sila kung paano umukit ng marble kahit kaunti lang. Ganun sana ang experience na magawa natin,” dagdag niya.
Pangarap din ni Alabado na ang mga produktong marmol ng Romblon ay maging hindi lamang simbolo ng lalawigan kundi ng buong MIMAROPA region. Kabilang dito ang paggawa ng mga souvenir items tulad ng mga morion na gawa sa marble at iba pang likhang-sining na maaaring iangkop sa kultura ng iba’t ibang probinsya sa rehiyon.
“Ang aking pangarap dito sa ating mga marbles ay maging souvenirs siya hindi lang ng Romblon kundi ng MIMAROPA region,” ani Alabado.
Iminungkahi rin ng DOT MIMAROPA official ang mas malawak na paggamit ng marmol sa mga establisimyento gaya ng mga hotel, resort, at pampublikong gusali upang agad makita at maramdaman ng mga turista na ang Romblon ang Marble Capital of the Philippines.
Ayon sa DOT, ang ganitong mga hakbang ay hindi lamang magpapalakas sa turismo kundi magbibigay rin ng dagdag na kabuhayan sa mga lokal na artisan at mag-aambag sa pagpapanatili ng natatanging kultura at identidad ng Romblon sa mata ng mga lokal at dayuhang bisita.
