Ibinida ng Department of Tourism (DOT) MIMAROPA ang natatanging yaman-dagat ng Romblon, partikular ang maliliit at bihirang species sa ilalim ng dagat, na patuloy na umaakit sa mga lokal at dayuhang diver.
Ayon kay Department of Tourism MIMAROPA Region OIC-Regional Director Roberto Alabado III, maraming turista ang pumipili ng Romblon bilang dive destination hindi dahil sa malalaking isda, kundi dahil sa mga maliliit na marine species na kadalasang hindi napapansin ng karaniwang tao ngunit labis na hinahanap ng mga diver.
“Maraming mga turistang gustong bumisita sa Romblon dahil gusto nilang makita ‘yung mga maliliit na species na binabalewala ng karamihan pero sa mga divers ay gustong-gusto ito,” pahayag ni Alabado nang ito ay dumalo sa pagbubukas ng Marble Festival 2026 sa bayan ng Romblon, Romblon nitong January 9.
Aniya, ito mismo ang ipinopromote ng DOT MIMAROPA sa mga international diving events, kung saan itinatampok ang Romblon bilang isang diving destination.
“Minsan akala mo ay buhangin lang at halos hindi mo na makita, pero sila, pumupunta talaga dito sa Romblon para lang makita ‘yun,” dagdag pa ni Alabado.
Patuloy ring lumalago ang diving industry sa Romblon, na nagbibigay ng kabuhayan sa mga lokal na dive guides, bangkero, resort operators at komunidad sa baybayin. Ayon sa DOT, mahalaga ang pangangalaga sa coral reefs at marine biodiversity upang mapanatili ang interes ng mga diver at masigurong pangmatagalan ang benepisyo ng turismo sa lalawigan.
Kabilang sa mga kilalang diving sites sa Romblon ang mga bahagi ng San Jose sa Carabao Island, na tanyag sa malinaw na tubig at macro marine life, at San Agustin sa Tablas Island, na dinarayo rin ng mga underwater photographers at scuba enthusiasts.
Bukod sa diving, kilala rin ang Romblon sa mga magagandang beach nito gaya ng Bonbon Beach sa Romblon, Romblon at Cresta de Gallo, na patuloy na umaakit sa mga turista dahil sa puting buhangin at mala-paraisong tanawin.
Nanawagan si Alabado sa publiko at sa pamahalaang lokal sa Romblon na patuloy na alagaan ang mga dagat upang mapanatiling buhay at masigla ang turismo sa lalawigan.
