Sugatan ang magkapatid na balut vendor na sakay ng motorsiklo matapos silang masalpok ng isa pang motorsiklo sa bayan ng San Andres, Romblon nitong gabi ng Oktubre 30.
Batay sa ulat ng mga saksi, marahan umanong bumibiyahe ang magkapatid na sina alyas Mario at alyas Reuel sakay ng kanilang motorsiklo habang naglalako ng balut nang biglang sumalpok sa kanila ang paparating na motorsiklo. Dahil sa lakas ng impact, sumemplang ang dalawang motor at tumilapon ang mga sakay.
Nagtamo ng mga sugat sa iba’t ibang bahagi ng katawan si alyas Mario, na agad tinulungan ng mga first responder mula sa San Andres Fire Station at isinugod sa ospital. Si alyas Reuel, na siyang nagmamaneho ng motor, ay nagtamo ng sugat at bali umano sa katawan.
Ang rider namang nakasalpok sa dalawa, nagtamo ng galos sa katawan. Ayon sa San Andres Municipal Police Station, nagkasundo na ang magkabilang panig at napag-usapan na ang pagpapagamot ni Mario, na patuloy pang nagpapagaling sa ospital.
Samantala, paalala ng mga awtoridad sa mga motorista na maging maingat sa pagmamaneho lalo na sa gabi, upang maiwasan ang mga ganitong aksidente sa kalsada.
Discussion about this post