Pormal na binuksan ng Bureau of Jail Management and Penology (BJMP)–Romblon District Jail ang National Correctional Consciousness Week (NACOCOW) 2025 nitong Lunes sa pamamagitan ng isang binasbasang misa na pinangunahan ni Most Rev. Narciso V. Abellana, M.S.C., D.D., Obispo ng Romblon.
Isinagawa ang misa sa loob ng compound ng kulungan bilang hudyat ng isang linggong pagdiriwang na nakatuon sa patuloy na pagbabago, pananampalataya, at paglilingkod publiko ng BJMP.
Sa kanyang homiliya, binigyang-diin ni Bishop Abellana ang kahalagahan ng pag-asa, malasakit, at pagbabagong espiritwal bilang mahahalagang sangkap sa proseso ng repormasyon ng mga Persons Deprived of Liberty (PDLs).
Dumalo sa banal na misa ang mga opisyal, kawani, at PDLs ng BJMP Romblon na sama-samang nagdasal at nagmuni-muni sa tema ng pagdiriwang na “Matatag na Paglilingkod, Makabagong Pamamaraan, Maunlad na Serbisyong Pampiitan.”
Layunin ng NACOCOW na palalimin ang pag-unawa ng publiko sa sistemang pampiitan ng bansa at kilalanin ang walang sawang pagsisikap ng mga jail personnel sa pagsusulong ng mga programang nagtataguyod ng rehabilitasyon at reintegrasyon ng mga PDLs sa lipunan.
Ayon kay Jail Officer 3 Joefrie Anglo, tagapagsalita ng BJMP MIMAROPA, ang pagdiriwang ay patunay ng pananampalatayang gabay sa misyon ng ahensya.
“Beyond the bars, there is always grace and renewal. We are called not only to guard but to guide — to see in every person deprived of liberty the image of a soul still worthy of redemption and a future restored by God’s mercy,” ayon kay Anglo. (PR)
