Bilang pakikiisa sa pagdiriwang ng ika-125 anibersaryo ng Civil Service Commission (CSC), nakatakdang magsagawa ng Job Fair ang Romblon Provincial Public Employment Service Office (PESO) sa darating na Setyembre 25, 2025 (Huwebes). Gaganapin ang aktibidad sa ground floor ng Provincial Multipurpose Building, Barangay Capaclan, Romblon, Romblon.
Lalahok sa naturang job fair ang ilang kompanya mula sa iba’t ibang industriya, kabilang ang Pebble Walk Beach Resort, Global Mode Manpower Services Inc., Skills Directory Corporation, at PKI Manufacturing and Technology Inc.
Mag-aalok sila ng malawak na hanay ng trabaho—mula sa lokal na employment opportunities sa loob ng lalawigan at bansa, hanggang sa overseas job openings para sa mga Romblomanong nagnanais magtrabaho sa ibang bansa.
Ayon sa Provincial PESO, ang job fair ay idinisenyo upang mailapit ang mga oportunidad sa trabaho sa mga residente ng Romblon, partikular sa mga bagong graduate, unemployed, underemployed, at sa mga naghahanap ng karagdagang career opportunities.
Magkakaroon ng on-site application at interview sa mismong araw ng job fair.
Inaanyayahan ng Pamahalaang Panlalawigan ng Romblon at ng PESO ang lahat ng Romblomanon na dumalo sa nasabing job fair at samantalahin ang pagkakataong makahanap ng trabaho.
