Isinusulong ni Congressman Eleandro Jesus F. Madrona ang House Bill No. 4230 na naglalayong ideklara ang bayan ng Romblon bilang “Marble Capital of the Philippines.”
Sa panukalang batas, kinikilala ang mayamang reserba ng marmol sa bayan ng Romblon na nagbigay-daan sa pag-usbong ng isang matagumpay na industriya ng marble at natatanging galing ng mga lokal na iskultor sa larangan ng stone carving. Layunin din nitong paigtingin ang turismo sa pamamagitan ng pagsasanib ng pamana at makabagong inobasyon.
Sakaling maisabatas, inaatasan ang Department of Tourism (DOT) na isama at itampok ang bayan ng Romblon sa kanilang mga pambansa at rehiyonal na programa sa promosyon bilang Marble Capital of the Philippines.
Sa kanyang paliwanag, binigyang-diin ni Cong. Madrona na ang industriya ng marmol sa Romblon ay nagsimula pa noong panahon ng kolonyalismong Espanyol at nakilala na sa buong mundo sa pamamagitan ng mga kilalang lokal na artisan ng marmol.
Ayon pa sa kanya, kinilala na ng Philippine Institute of Volcanology and Seismology at Department of Environment and Natural Resources ang mayamang heolohikal na katangian ng bayan ng Romblon, kung saan ang marmol ay itinuturing na pangunahing non-metallic resource.
Dahil dito, matagal nang isinama ng Department of Trade and Industry (DTI) ang mga produktong marmol mula Romblon sa ilalim ng One Town, One Product program, na isinusulong sa lokal at pandaigdigang merkado.
Dagdag pa niya, ang industriya ng marmol ay nananatiling mahalagang bahagi ng lokal na turismo, na parehong nakikinabang sa pagpapanatili ng tradisyunal na stone carving at sa mga makabagong inobasyon na nagbigay ng pandaigdigang pagkilala sa mga artisanong Romblomanon.
