Nakuha ng Team Romblon ang kampeonato sa katatapos na Under-16 MIMARO Regional Football Association Domestic Qualifying Tournament na ginanap sa Calapan City, Oriental Mindoro noong Agosto 23–24, 2025.
Nilahukan ang torneo ng mga koponan mula sa Occidental Mindoro (OkSi FA), North Mindoro, South Mindoro, Mid Mindoro, at Romblon, at ito ay opisyal na sanctioned ng Philippine Football Federation (PFF).
Ipinamalas ng Team Romblon ang matinding dominasyon matapos makapagtala ng clean sheet laban sa lahat ng kanilang nakalaban sa single round-robin format ng torneo. Sa kanilang unang laban ay tinambakan nila ang OkSi FA sa score na 8–0 kung saan hat-trick ang naitala ni Aljo Escalada, sinundan ng dalawang goal ni James Magada, at tig-iisang goal mula kina Ivan Liao, Rafael Villanueva, at Carl Madeja. Sa ikalawang laro naman ay tinalo nila ang North Mindoro sa score na 9–0. Dito ay nanguna si Jaspyr Sy na nakapagtala ng apat na goals, sinundan ni Escalada na may dalawang goals, habang nag-ambag ng tig-iisang goal sina Arsenio Dela Cruz, Rafael Villanueva, at Stephen Teodoro. Sa kanilang huling laban ay dinomina nila ang South Mindoro sa score na 14–0. Sa laban na ito ay umangat si James Magada na nakapagtala ng anim na goals, sinundan ni Carl Madeja na may tatlong goals, Arsenio Dela Cruz at Rafael Villanueva na kapwa may tig-dalawang goals, at isa pang goal mula kay Jaspyr Sy.
Bukod sa kampeonato, nag-uwi rin ng mga individual awards ang Romblon players. Nakuha ni Stephen Teodoro ang Best Defender of the Tournament habang si Jhon Albert Fajiculay naman ang itinanghal na Best Striker of the Tournament.
Dahil sa panalong ito, pasok na ang Team Romblon sa National Finals ngayong Oktubre at kasalukuyan na lamang naghihintay sa iba pang magwawaging koponan mula sa mga regional qualifiers sa buong bansa.
Narito ang kumpletong lineup ng Team Romblon na nagbigay ng karangalan sa probinsya: Aljo Escalada, Arsenio Dela Cruz, Francis Jasphyr Sy, James Harris Magada, Jan Aljur Mortel, Jashmyrr Sean Mirabete, Jhon Albert Fajiculay, Jhon Steven Teodoro, Jose Miguel Manzo, Kurt Eleazar Madali, LJ Rafael Villanueva, Luke Brion Madrona, Prince Carl Madeja, Rainer Rotoni, Vincent Nicko Riano, Ivan Liao, at Vincent Morron. Ang koponan ay ginabayan ni Head Coach Loueijohn Valeroso at Assistant Coach Francis Mabasa.
