Nangako si Konsehal Miguel Montojo ng Romblon, Romblon na pangungunahan ang serye ng mga reporma upang gawing “pinakaproduktibo, pinakamasinop, at pinakamatino” ang ika-13 Sangguniang Bayan ng munisipalidad.
Sa kanyang privilege speech sa pagbubukas ng bagong sesyon, sinabi ni Montojo na panahon na upang tapusin ang impresyon na ang mga konseho ay mabagal, tahimik, at seremonyal lamang.
“Magpakakatotoo tayo: alam natin ang mga batikos na ibinabato sa mga konseho… Matatapos na iyon dito, at matatapos na ngayon,” aniya.
Bilang panimula ng reporma, naghain si Montojo ng tatlong panukalang batas:
Isa itong malawakang rebisyon sa Internal Rules of Procedure ng konseho, kabilang ang mga deadline para sa mga komite, parusa para sa hindi pag-aksyon, at mandatong digital transparency upang matiyak ang accountability.
“Wala nang mauupo lang, wala nang magpapahinga sa konsehong ito, habang ako ang Chairman ng ating Committee on Rules,” pahayag ni Montojo.
Pangalawa, naghain siya ng ordinansa para gawing institusyonal ang pagbuo ng municipal legislative districts at obligahin ang bawat konsehal na maghain ng hindi bababa sa dalawang ulat kada taon para sa kanilang distrito, upang masiguro na walang barangay ang mapapabayaan.
Pangatlo, isang resolusyon para pormal na magtatag ng standing committee chairmanships na magbibigay ng malinaw na istruktura at responsibilidad sa konseho.
Bukod sa mga panukalang ito, nangako si Montojo na paiigtingin ang laban kontra katiwalian. Sa kanyang distrito ng Tres Islas (Logbon, Alad, at Cobrador), hinikayat niya ang mga residente na isiwalat ang mga politiko at kandidatong sangkot sa vote-buying.
“I intend to make the Tres Islas a district that cannot be bought, a district that sets the bar,” pahayag pa niya.
Hinamon din niya ang mga kapwa konsehal na gawin ang kapareho sa kanilang mga barangay.
Sa kanyang talumpati, ibinunyag din ni Montojo ang plano niyang buuin ang Romblon Municipal Youth Parliament, ang kauna-unahan sa probinsya, bilang isang plataporma para isali ang kabataan sa seryosong paggawa ng polisiya at diskurso, at hindi lamang bilang mga tagapanood sa social media.
Sa huli, ipinahayag din niya ang buong suporta sa bagong administrasyon ni Governor Trina Firmalo-Fabic at sinabing handa siyang makipag-ugnayan para mapalakas ang serbisyo-publiko sa lahat ng antas.
