Nagsagawa ng coastal clean-up ang mga personnel ng Romblon District Jail sa sikat na Bonbon Beach noong Biyernes, kung saan nakalikom sila ng anim na sako ng basura gaya ng plastic waste, driftwood, at iba pang kalat sa dalampasigan.
Layunin ng isinagawang clean-up na mapanatili ang kagandahan ng lugar sa pamamagitan ng pagtanggal ng mga basura na maaaring makasama sa buhay-dagat at makaapekto sa turismo ng komunidad.
“Ang aming pangangalaga sa kapaligiran ay hindi lang natatapos sa loob ng piitan,” ayon kay Jail Officer 3 Joefrie Anglo, Regional Information Officer ng Bureau of Jail Management and Penology MIMAROPA.
“Sa pamamagitan ng mga aktibidad tulad ng Bonbon Beach clean-up, nais naming itanim sa aming mga personnel ang halaga ng pakikiisa at responsibilidad sa komunidad upang mapanatili ang isang malinis at masaganang kapaligiran para sa lahat,” dagdag pa niya.
Ang Bonbon Beach na matatagpuan sa Barangay Lonos ay kilala sa malinis at mala-paraisong tanawin, bukod pa sa kahanga-hangang natural na sandbar na nag-uugnay sa Bangug Island.
Kamakailan lamang, kinilala ito bilang isa sa 50 pinakamagagandang beach sa buong mundo dahil sa likas nitong ganda at katahimikan.
