Halos 500 mangingisda mula sa bayan ng Romblon ang nagtipon kahapon, May 28, sa isinagawang Fisherfolks Forum upang mariing ipahayag ang kanilang pagtutol sa komersyal na pangingisda sa loob ng 15-kilometrong municipal waters.
Ang forum ay pinangunahan ng lokal na pamahalaan ng Romblon, sa pamamagitan ng Municipal Agriculturist Office (MAO), bilang bahagi ng pagdiriwang ng Farmers’ and Fisherfolk’s Month.
Nagsilbi itong makapangyarihang patunay ng pagkakaisa at paninindigan ng komunidad sa pagtatanggol ng kanilang kabuhayan.
Binibigyang-diin ng isinagawang pagtitipon ang matibay na paninindigan ng lokal na pamahalaan sa pangangalaga sa likas-yaman ng karagatan at karapatan ng mga maliliit na mangingisda.
Ayon sa MAO, inaasahang maglalabas ang lokal na pamahalaan Romblon ng mga resolusyon at konkretong planong aksyon kaugnay ng mga napag-usapan sa forum sa mga susunod na araw.
Katuwang ng LGU sa pagsasagawa ng aktibidad ang Provincial Government of Romblon, Oceana Philippines, at ang Agricultural and Fishery Council, na pawang sumusuporta sa adbokasiya para sa sustainable at makatarungang pangingisda.
