Sa kanyang mensahe para sa paggunita ng Semana Santa, nanawagan si Romblon Governor Jose Riano sa kanyang mga kababayan na gawing inspirasyon ang pag-ibig at kabutihan ng Panginoon upang lalong mapalalim ang pananampalataya at isabuhay ang mga aral ni Kristo.
“Sa mga sandali ng katahimikan at pagninilay, nawa'y higit pa nating mapalalim ang ating pananampalataya at maisabuhay ang Kanyang mga aral, kababaang-loob, kapatawaran, at tunay na malasakit sa kapwa,” ani Riano.
Binigyang-diin din ng gobernador ang kahalagahan ng pagkakaisa at respeto sa gitna ng pagkakaiba-iba ng pananaw, lalo na sa larangan ng pulitika. Aniya, mas kailangang manaig ang pagmamahalan at pag-unawa sa bawat isa upang makamit ang layuning magkaroon ng maunlad at mapayapang komunidad.
“Bagama’t tayo’y may kanya-kanyang paniniwala at pananaw, lalo na sa larangan ng pulitika, higit nating kailangan ang pagkakaisa, paggalang sa isa’t isa, at pagmamahalan,” dagdag pa niya.
Mula sa kanyang pamilya, ipinaabot din ni Governor Riano ang hangarin para sa isang mataimtim at mapagpalang Semana Santa para sa lahat ng taga-Romblon.
“Nawa’y patuloy tayong pagpalain ng Panginoon ng kapayapaan, pag-asa, at lakas ng pananampalataya,” aniya.
