Nagpahayag si Romblon Governor Jose Riano na kaisa siya ng mga tao na ayaw sa metallic mining lalo na sa isla ng Sibuyan.
“Ang Stand ko talaga jan [sa mining] ay ayaw ko talaga niyan. Hindi ko lang masabi doon [sa barikada] na Pro o Anti ako dahil gobernador ako ng lahat, both sides. May sinumpaan akong tungkulin na sumunod dapat sa batas. Mabuti at may nakita tayong violations kaya naipasara natin kasama ang DENR,” pahayag ng gobernador sa ng makausap ng mga mamahayag sa Odiongan nitong Lunes.
“Sinasabi ko, hangga't ako ang gobernador, walang mina sa Sibuyan. Back to zero yan sila. Hindi na matutuloy yang mina jan. Kaya sinasabi ko na ngayon, pag ako ang nakaupo, hangga't ako ang nakaupo, hindi na mag-ooperate ‘yang mina,” dagdag pa nito.
Paglilinaw ng gobernador, wala pa siya sa politika nang magsimulang mag-apply ng Mineral Production Sharing Agreement ang APMC. Paliwanag pa nito, taong 2005 nang magbigay ng certificate at mga resolution ang National Commission on Indigenous Peoples, Barangay Taclobo, Barangay España at ang Sangguniang Panlalawigan ng Romblon na pinapaburan ang proyekto ng APMC.
“Yang application, nagsimula yan noong 2004. Wala pa ako jan. Noong umupo si President Aquino, nagkaroon ng moratorium sa metallic mining pero noong 2022 bago bumaba si President Duterte, na-lift ‘yung moratorium kaya gumalaw yung Altai Mining Philippines Corporation (APMC),” kwento ng gobernador.
Dagdag nito, ginawa ng mga residente ng Sibuyan ang bahagi nila para mapatigil ang mina noong 2023 at ginawa naman ng pamahalaang panlalawigan ang parte naman nito.
Kwento nito, noong unang linggo ng Pebrero 2023, kasama ng mga opisyal mula sa Philippine National Police, Department of Interior and Local Government, at mga nasa local government, nakipagpulong sila sa mga leader ng anti-mining maging sa grupo ng APMC para mapag-usapan ang lumalalang sitwasyon sa Sitio Bato.
Personal niya umanong tinawagan ang mga opisyal ng DENR sa MIMAROPA para ilapit ang kasalukuyang sitwasyon sa Sitio na naging punto para madaliin ng ahensya ang paglalabas ng cease and desist order.
“Madami kasing nasasaktan na doon. May mga batang baka magkasakit dahil ilang araw nang nakatambay doon sa barikada. Hindi tayo pumayag na ipagpabukas pa nila ‘yung paglalabas ng cease and desist order. Kaya ang ginawa, on that night, naglabas agad ng order,” kwento ng gobernador.
Ang mga pahayag na ito ng gobernador ay kasunod ng ikalawang anibersaryo ng pagtatayo ng barikada ng mga residente ng San Fernando sa Sitio Bato sa Barangay España para harangin ang mga dambuhalang truck ng APMC.
