Nasawi ang pahinante ng isang truck na nawalan ng preno at nahulog sa bangin sa bahagi ng Barangay Capaclan, Romblon, Romblon umaga ng Linggo.
Sa police report na pinadala ng Romblon Police Provincial Office, kinilala ang nasawi na si Michael Dayalo, 35, residente ng Barangay Agbaluto.
Ayon sa ulat, nawalan ng preno ang truck habang binabaybay ang Sitio Highlander. Bago mahulog sa halos 100 metrong lalim na bangin, inararo muna ng truck ang apat na sasakyang nakaparada sa gilid ng kalsada.
Nakatalon naman ang driver ng truck na kinilalang si Filino Moreno, 43, habang ang nasawing pahinante ay naiwan sa loob ng sasakyan.
Sinubukan pa siyang i-revive sa Romblon District Hospital kung saan siya isinugod ngunit idinkelara din itong dead on arrival.
Hawak na ngayon ng Romblon Municipal Police Station si Moreno at mahaharap sa kasong Reckless Imprudence Resulting in Homicide and Multiple Damage to Property.
