Mariing itinanggi ng Philippine Air Force ang napabalitang araw-araw- na bumibiyahe si Vice President Sara Duterte mula Manila patungo ng Davao gamit ang sasakyan mula sa 250th Presidential Airlift Wing.
Ayon kay Col. Ma. Consuelo Castillo, spox ng PAF, walang katotohanan ang balita na ito.
Ito ay kasunod na magpasalamat si Duterte kay President Marcos at sa 250th PAW dahil sa pagsiguro umano na nakakauwi siya sa kanyang mga anak paglubog ng araw.
Ayon kay Castillo, hindi umano praktikal ang rutang Manila to Davao gamit ang helicopters dahil aabutin ito ng kalahating araw at kailangan pang huminto ng ilang beses para magpa-gasolina.
“Hindi po talaga rational and practical kung gagamitin ang helicopter natin sa pag-uwi sa Davao araw-araw especially if coming from Metro Manila,” dagdag pa ni Castillo.
Lahat din umano ng helicopters ng 250th PAW ay ginagamit lamang sa mga opisyal na tungkulin at dapat din na aprubado ng Presidente.
